Pune : माॅरिशस येथील मराठी विश्व साहित्य संमेलनात बाळासाहेब तोरस्कर सन्मानित

15 April 2024

Pune/ राजेंद्रकुमार शेळके : मॉरीशस मध्ये शब्द साहित्य संस्थेतर्फे नुकतेच आठव्या मराठी विश्व साहित्य संमेलनाचे आयोजन करण्यात आले होते. या संमेलनात सोळांकुर येथील जेष्ठ कवी बाळासाहेब तोरस्कर यांना त्यांच्या साहित्यातील योगदानाबद्दल मान्यवरांच्या हस्ते सन्मानित करण्यात आले.

हाॅटेल ली ग्रँड ब्लू, कोस्टल रोड, माॅरिशस येथे संमेलनाध्यक्ष जेष्ठ साहित्यिक प्राचार्य अनिल गजभिये इंदोर यांच्या हस्ते व उद्घाटक आंतरराष्ट्रीय चित्रकार विजय राऊत, मराठी भाषा अभ्यासक प्रकाश निर्मळ पुणे, साहित्यिक दगडू लोमटे, गझलकार सिध्दार्थ भगत, शब्द परिवाराचे अध्यक्ष संजय सिंगलवार, कवी कृषिभूषण दिपक आसेगांवकर पुसद, कवी डॉ. राजेंद्र राठोड, शब्दच्या उपाध्यक्षा शशी डंभारे, कवी डॉ.अनिल काळबांडे, या मान्यवरांच्या उपस्थितीत सन्मानचिन्ह श, सन्मानपत्र देऊन तोरस्करांना सन्मानित करण्यात आले. Pune

तोरस्कर हे अ.भा.मराठी साहित्य परिषद पुणे चे ठाणे विभागीय अध्यक्ष, राष्ट्रीय शिक्षक संचेतना राष्ट्रीय प्रवक्ते व काव्यप्रेमी शिक्षक मंचचे राज्य सल्लागार सदस्य, जायंट गृप आॅफ कोल्हापूर मेट्रोचे माजी अध्यक्ष व साहित्य संपदा दिवाळी अंकाचे निवासी संपादक, कृषिराज दिवाळी अंकाचे उपसंपादक आहेत. त्यांचे “प्रीतफुले” व “वाळवंटातील झरे” हे दोन कवितासंग्रह प्रकाशित झाले असून त्यांना अनेक राज्यस्तरीय राष्ट्रीय व आंतरराष्ट्रीय साहित्यिक पुरस्कार प्राप्त झाले आहेत.

सातासमुद्रापार मराठी साहित्याचा झेंडा मागील आठ वर्षापासून जागतिक शब्द मराठी साहित्य संमेलना निमित्ताने रोवला गेला. बँकाँक, दुबई, इंडोनेशिया, मलेशिया, श्रीलंका, मालदी, नेपाळ नंतर आता माॅरिशसमध्ये या शब्द मराठी साहित्य संमेलनाचे आयोजन करण्यात आले होेते. या संमेलनासाठी महाराष्ट्रातून ५० साहित्यिक उपस्थित होते. या साहित्य संमेलनात परिसंवाद, गझल मुशायरा, कविसंमेलन, शोध निबंध वाचन, चर्चासत्र, सांस्कृतिक कार्यक्रम आदी उत्साहात पार पडले.