Naxal Encounter : छत्तीसगड-महाराष्ट्र सीमेवर पोलिस आणि नक्षलवाद्यांत मोठी चकमक, २९ नक्षलवाद्यांचा खात्मा

17 April 2024

Chhattisgarh Naxal Encounter : छत्तीसगड-महाराष्ट्र सीमेवर छत्तीसगड पोलिसांनी मोठी कारवाई केली आहे. लोकसभा निवडणूकीच्या मतदानाच्या अगोदरच छत्तीसगड पोलिसांनी तब्बल २९ नक्षलवाद्यांचा खात्मा (Naxal Encounter) केल्याची माहिती आहे. या कारवाईत नक्षलवाद्यांचा कमांडर शंकरराव हा देखील ठार झाला असून तीन जवान जखमी झाले आहेत.

पोलीस सूत्रांनी दिलेल्या माहितीनुसार, छोटे बेटिया पोलीस हद्दीतील जंगल परिसरात मोठी नक्षल कारवाई सुरू असल्याची गुप्त माहिती छत्तीसगड पोलिसांना मिळाली होती. छत्तीसगढच्या कांकेरमध्ये DRG आणि BSF आणि माओवाद्यांच्या संयुक्त दलामध्ये चकमक झाली. संयुक्त टीम या परिसरात नक्षलविरोधी अभियानासाठी जात असताना त्यांच्यावर दुपारी ३ वाजताच्या दरम्यान अचानक गोळीबार सुरू झाला. या चकमकीत २९ नक्षलवादी ठार (Naxal Encounter) झाले.

या चकमकीत नक्षलवाद्यांचा कमांडर शंकरराव हा देखील ठार झाला. चकमकीच्या ठिकाणाहून २९ मृतदेह सापडले आहेत. शंकर राव याच्यावर २५ लाखांचे बक्षीस होते. उर्वरित मृतदेहांची ओळख पटविण्यात येत असून यात आणखी काही मोठ्या नक्षल नेत्यांचा समावेश असू शकतो. घटनास्थळावरून मोठ्या प्रमाणात आधुनिक रायफल, सात एके 47, एलएमजी आणि इन्सास रायफलही जप्त करण्यात आले.

या चकमकी दरम्यान इन्स्पेक्टरसह बीएसएफचे तीन जवानही जखमी झाले. जवानांना उपचारासाठी हेलिकॉप्टरने रुग्णालयात नेण्यात आले. त्यांच्यावर रुग्णालयात उपचार सुरु आहेत.