ST Bus : लालपरीचा प्रवास महागणार! तब्बल ‘इतक्या’ वाढीची शक्यता

16 April 2024

ST Bus : सर्वसामान्य जनतेच्या खिशाला कात्री बसणार आहे. कारण महाराष्ट्र राज्य मार्ग परिवहन महामंडळाने सर्व प्रकारच्या बसेसचे तिकीट दर वाढवण्याचा निर्णय घेतला आहे. यामध्ये तिकीट दरात १० टक्के वाढ होण्याची शक्यता वर्तवली येत आहे.

ही तिकीट दरवाढ हंगामी राहणार असून एप्रिल ते १५ जूनपर्यंत ही भाडेवाढ असणार आहे. त्यानंतर पुन्हा एकदा तिकिटाचे दर पूर्ववत केले जाणार असल्याचेही समजते. भाडेवाढीसाठी राज्य परिवहन प्राधिकरणाची परवानगी आवश्यक आहे. त्यासाठीचा प्रस्ताव राज्य परिवहन (ST Bus) प्राधिकरणाकडे मंजुरीसाठी पाठवण्यात आला आहे.

उन्हाळी सुट्टीत मूळ गावी, पर्यटनासाठी मोठ्या प्रमाणात नागरिक प्रवास करतात. शालेय विद्यार्थ्यांना आता उन्हाळी सुट्टी सुरू झाली आहे. 10 एप्रिलपासून उन्हाळी हंगाम सुरू झाला आहे. राज्याच्या कानाकोपर्‍यात एसटी धावते. सध्या 13 हजार एसटीच्या माध्यमातून दिवसभरात सुमारे 55 लाख प्रवासी एसटीने प्रवास करतात. उन्हाळी सुट्टीत प्रवाशांची जास्त गर्दी होते. एसटीच्या प्रवासाला नागरिक प्राधान्य देतात. या प्रवासी गर्दीतून महसूल वाढीसाठी महामंडळाने 10 टक्के हंगामी भाडेवाढीचा प्रस्ताव तयार केला आहे.