ताज्या बातम्या राजकारण राज्य लोकसभा २०२४

भाजप नेते चंद्रकांत पाटीलांच्या सभेतच शेतकऱ्यांचा गोंधळ

12 April 2024

Chandrakant Patil : भारतीय जनता पक्षाचे ज्येष्ठ नेते तथा माजी प्रदेशाध्यक्ष मंत्री चंद्रकांत पाटील यांच्या सभेच शेतकऱ्यांनी गोंधळ घातल्याची घटना घडली आहे. माढा लोकसभा मतदारसंघात रणजितसिंह नाईक निंबाळकर यांना भाजपने उमेदवारी दिली. त्यांचा प्रचार करण्यासाठी भारतीय जनता पक्षाचे ज्येष्ठ नेते तथा माजी प्रदेशाध्यक्ष मंत्री चंद्रकांत पाटील (Chandrakant Patil) यांच्या उपस्थितीमध्ये शेतकऱ्यांच्या बैठकीचे आयोजन करण्यात आले होते. चालू बैठकीमध्येच एका शेतकऱ्याने माझे २२ लाखांचं नुकसान झाल्याचा दावा करत गोंधळ घातला.

माढा लोकसभा मतदारसंघाचे उमेदवार खासदार रणजितसिंह नाईक निंबाळकर यांच्या प्रचारार्थ टेंभुर्णी येथे बैठकीचे आयोजन केले होते. या बैठकीसाठी भाजप नेते आणि सोलापूरचे पालकमंत्री चंद्रकांत पाटील (Chandrakant Patil) उपस्थित होते. या मेळाव्यात पालकमंत्री चंद्रकांत पाटील यांचे भाषण सुरू असतानाच टेंभुर्णी येथील शेतकरी संपतराव काळे यांनी आपले आयुर्वेदिक वनस्पती लागवडीमध्ये २२ लाख रुपयांचे नुकसान झाल्याचे म्हणत चंद्रकांत पाटीलांना जाब विचारला.

त्यावेळी चंद्रकांत पाटील यांनी सर्वांना शांत राहण्याचा आवाहन करत शेतकऱ्यांचे म्हणणे ऐकून घेतले. मात्र, भाजपच्या काही कार्यकर्त्यांनी धक्काबुकी करत शेतकऱ्याला बाहेर काढण्याचा प्रयत्न केला, त्यामुळे बैठकीत एकच गोंधळ उडाला. काही काळ तणाव निर्माण झाला होता.