ताज्या बातम्या राजकारण राज्य लोकसभा २०२४

Gandhi Ambedkar : गांधी-आंबेडकरांचे पणतू पुन्हा आमने-सामने !

13 April 2024

Prakash Ambedkar on Tushar Gandhi : महात्मा गांधीचे पणतू तुषार गांधी यांनी प्रकाश आंबेडकर यांच्या वंचित बहुजन आघाडीला मतदान न करण्याचे आवाहन केले आहे. यावर आता वंचितचे अध्यक्ष प्रकाश आंबेडकरांनी प्रत्यूत्तर दिले आहे. प्रकाश आंबेडकरांनी तुषार गांधींना कोणताही आधार नसलेले आणि वंचित बहुजनांच्या राजकारणात अडथळा निर्माण करणारे विधान असल्याचे म्हटले आहे. (Gandhi Ambedkar)

वंचितचे अध्यक्ष प्रकाश आंबेडकरांनीही (Prakash Ambedkar) सोशल मीडिया लिहले की, तुम्ही अलीकडे केलेले विधान अत्यंत चुकीचे, कोणताही आधार नसलेले आणि वंचित बहुजनांच्या राजकारणात अडथळा निर्माण करणारे आहेच; पण संसदीय लोकशाही आणि स्वतंत्र राजकीय नेतृत्वासाठीच्या प्रयत्नांना, तसेच वर्ग, जात आणि धर्माच्या पलीकडे जावून सुरू असलेल्या सर्वसमावेशक राजकारणाला नाकारणारे आहे. तुमच्या आजोबांची ब्रिटिशांविरुद्धची चळवळ सर्वसमावेशक होती, पण तुमचे विचार आणि राजकारणामध्ये तशी स्पष्टता दिसत नाही. महाविकास आघाडीने वंचित बहुजन आघाडीसोबत कसा व्यवहार केला हे तुम्हाला माहिती नाही का? त्यांचे राजकारण किती अलिप्त आहे हे तुम्हाला माहीत नाही का? महाविकास आघाडी आणि भाजपच्या नेत्यांमध्ये झालेली तडजोड तुम्हाला माहिती नाही का? असा सवाल केला आहे.

तसेच, त्यांनी पुढे म्हटले आहे की, जर तुमच्याकडे राजकीय ज्ञान आणि समज नसेल, तर कृपया निरर्थक गोष्टी करण्यात आणि निराधार आरोप करण्यात तुमचा वेळ घालवू नका. काळच सत्य परिस्थिती समोर आणेल. खरं तर, आताच सगळे संकेत दिसत आहेत. पण, तुम्ही डोळे झाकल्यासारखे संदर्भहीन ज्याला काहीही आधार नाही असे वक्तव्य करून जनतेमध्ये संभ्रम निर्माण करीत आहात.

दरम्यान, तुषार गांधी यांनी वंचित बहुजन आघाडीनं वेगळी चूल मांडल्यानं पुरोगामी विचारांच्या पक्षांना काही प्रमाणात फटका बसू शकतो, अशी शक्यता व्यक्त केली होती. तसेच त्यांनी वंचितला मतदान न करण्याचे आवाहन केले होते.