आंबेगाव जिल्हा जुन्नर ताज्या बातम्या राज्य

Hirda Crop : हिरडा उत्पादक शेतकऱ्यांचा लढा पुन्हा सुरू होणार; गावागावांमध्ये शेतकरी घेणार “प्रतिज्ञा”

5 July 2024

पुणे : आंबेगाव आणि जुन्नर तालुक्यातील आदिवासी शेतकऱ्यांना हिरडा नुकसानभरपाई देण्याविषयी शासनाने काढलेल्या दि. १२ मार्च २०२४ रोजीच्या शासननिर्णयाची अंमलबजावणी करण्यासाठी आणि शासनाचे लक्ष्य वेधण्यासाठी आज (दि.५ जुलै) गावागावात निर्धार प्रतिज्ञा घेऊन, हिरडा उत्पादक एकजूट दाखवतील. त्यानंतरही शासनाला जाग आली नाही तर ऐन श्रावण महिन्यात गावोगाव आंदोलनास सुरुवात होईल. असा इशारा किसान सभेच्या पदाधिकाऱ्यांनी दिला आहे. (Hirda Crop)

जून – २०२० साली निसर्ग चक्रीवादळामुळे झालेल्या हिरडा नुकसानीची भरपाई देण्याविषयी राज्यशासनाने दि. १२ मार्च २०२४ रोजी शासन निर्णय काढला आहे; परंतु त्याची अद्याप अंमलबजावणी झाली नाही. या शासन निर्णयाची अंमबजावणी होऊन, हिरड्याची नुकसान भरपाई त्वरित शेतकऱ्यांच्या खात्यावर जमा व्हावी. यासाठी आंबेगाव, जुन्नरमधील हिरडा उत्पादक शेतकरी यांनी येत्या शुक्रवारी (दि. ५) गावागावात निर्धार प्रतिज्ञा घेऊन, हिरडा उत्पादकांची एकजूट दाखवतील, असे आवाहन किसान सभेच्या पुणे जिल्हा समितीने केलेले आहे. (Hirda Crop)

हिरडा नुकसानभरपाई देण्याविषयी – शासनाने काढलेल्या दि.१२ मार्च २०२४ रोजीच्या शासननिर्णयाची अंमलबजावणी न झाल्यास, ऐन श्रावण महिन्यात आंदोलनास सुरुवात होईल, असे किसान सभेचे पदाधिकारी डॉ. अमोलवाघमारे, राजू घोडे, विश्वनाथ निगळे, अशोक पेकरी, लक्ष्मण जोशी, आमोद गरुड, रामदास लोहकरे, विकास भाई, संतोष कांबळे यांनी सांगितले.