हमीभावासाठी शेकापच्या खटाऱ्याला मत देऊन, बेईमानी करणाऱ्यांना धडा शिकवा – ॲड नारायण गोले पाटील

18 October 2024

Majalgaon: शेतकऱ्याची शेतमालाला हमीभाव मिळवण्यासाठी शेतकरी कामगार पक्षाचा खटारा विधानसभेत पाठवून, माजलगाव मतदार संघात गेल्या पाच वर्षात शेतकऱ्या सह नागरिकांच्या विविध समस्या सोडवण्यात अपयशी ठरणाऱ्या आणि जनतेशी,जनतेच्या मताशी गद्दारी करणाऱ्यांना माजलगाव विधानसभा निवडणुकीत धडा शिकवा असे आवाहन शेतकरी कामगार पक्षाचे विधानसभेचे उमेदवार ॲड नारायण गोले पाटील यांनी सरवर पिंपळगाव, सोमठाणा, अडोळा येथे प्रचार दौऱ्यात बोलताना केले.

गतवेळी विधानसभा निवडणुकीत माजलगाव मतदार संघातील शेतकरी, कष्टकरी, अल्पसंख्यांक, दलित, मुस्लिम समाजाने पुरोगामी विचाराचे उमेदवार म्हणून ज्यांना मते दिली त्याच लोकांनी जनतेच्या मताशी गद्दारी करत पहाटे शपथविधीला उपस्थिती दर्शवली तसेच अजित पवार यांच्यासह भाजपसोबत घरोबा करून पुरोगामी विचाराशी आणि जनतेच्या मताशी गद्दारी केली. याशिवाय पाच वर्षात तालुक्यात माजलगाव मतदार संघात शेतकऱ्यांसह, कामगारांच्या, तरुणांच्या, विद्यार्थ्यांच्या प्रश्नावर उदासीनता दाखवत शेतकऱ्यांना देशोधडीला लावणाऱ्या भाजपला बळ दिले. त्यामुळे जनतेशी गद्दारी करणाऱ्यांना या निवडणुकीत त्यांची जागा दाखवा. याशिवाय जाती-जातीत भांडणे लावणाऱ्या आणि महागाई वाढवुन देशोधडीला लावणाऱ्या व शेतकऱ्यांच्या शेतमालाला उत्पादन खर्चावर आधारित किफायतशीर हमीभाव न देणाऱ्या, मराठा समाजा सह धनगर समाजाला आरक्षण नाकारणाऱ्या सरकारला घरचा रस्ता दाखवण्यासाठी शेतकऱ्याच्या कुटुंबातील कार्यकर्ता म्हणून शेतकरी कामगार पक्षाच्या खटारा चिन्हावर मत देऊन विजयी करण्याचे आवाहन ॲड.नारायण गोले पाटील यांनी केले.

यावेळी मुंजा पांचाळ, लक्ष्मण आप्पा चव्हाण, राहुल सोळंके, श्रीराम शेवाळे, जनार्दन कुदळे, भास्कर कांबळे, यांच्यासह सरवर पिंपळगाव, सोमठाणा, अडोळा शेकडो नागरिकांची उपस्थिती होती.