Kopardi Crime: दलित तरुणाला विवस्त्र करून मारहाण, अपमानीत भावनेतून आत्महत्या

3 May 2024

Kopardi Crime : कोपर्डी येथून एक धक्कादायक घटना समोर आली आहे. कोपर्डी येथील एका दलित तरुणाला विवस्त्र करून मारहाण आणि जातिवाचक शिवीगाळ करत स्मशानभूमीत बसल्याची धक्कादायक घटना घडली. यातून अपमानीत झाल्याच्या भावनेतून त्याने आत्महत्या केली आहे. या घटनेमुळे राज्यात एकच खळबळ उडाली आहे.

सविस्तर माहिती अशी की, कोपर्डी येथे बुधवारी रात्री भैरवनाथ यात्रेच्या निमित्ताने तमाशाच्या कार्यक्रमाचे आयोजन करण्यात आले होते. त्यावेळी दलित तरूण नितीन शिंदे (वय ३७ वर्षे) हा तमाशा सुरू असताना व्यासपीठाजवळ नाचत होता. त्यावेळी काही जणांनी त्याच्या नाचण्याला हरकत घेत त्याला मारहाण केली. यावेळी काही जणांनी मध्यस्थी करत भांडण सोडवले. मात्र त्याला घरी जात असताना दिनेश ऊर्फ बंटी बाबासाहेब सुद्रिक, स्वप्निल बबन सुद्रिक, वैभव मधुकर सुद्रिक या तिघांनी त्याला रस्त्यात अडवले.

तसेच, दलित तरुण नितीन शिंदे याला जातिवाचक शिवीगाळ करत विवस्त्र करून मारहाण करण्यात आली. त्याचा मोबाईलही काढून घेण्यात आला. त्याला रात्रभर स्मशानभूमीत बसण्यात आले. अखेर सकाळी त्याने घरी निरोप पाठवला तेव्हा त्याचे नातलग कपडे घेऊन आले आणि त्याला घरी नेले. त्यावेळी अपमानीत झाल्याच्या भावनेतून नितीन शिंदे याने घरातच आत्महत्या केली. गुरुवार, २ मे रोजी ही दुर्दैवी घटना कोपर्डी येथे घडली.

Kopardi Crime

या तरुणाने आत्महत्येपूर्वी लिहिलेल्या चिठ्ठीतून याचा उलगडा झाला असून याआधारे तीन जणांविरोधात गुन्हा दाखल करण्यात आला आहे. तरुणाने चिठ्ठीमध्ये असे लिहले आहे की, स्वप्निल सुद्रिक आणि बंटी सुद्रिक हेच माझ्या आत्महत्येला जबाबदार आहेत. याप्रकरणी मृताचे वडील कांतीलाल शिंदे यांनी कर्जत पोलिस ठाण्यात फिर्याद दिली आहे. तसेच याप्रकरणी पुढील तपास करत आहेत.

दरम्यान, या घटनेनंतर कोणताही अनुचीत प्रकार घडू नये यासाठी कर्जत पोलिसांनी कोपर्डीत मोठा बंदोबस्त वाढवला आहे.