सुवर्णसंधी ! सरकारी रुग्णालयात 14,000 पदभरती !

24 July 2023

मुंबई : राज्यातील सरकारी रुग्णालये, दंत महाविद्यालयांत 13 हजार 391 पदे रिक्त असून आयुर्वेद महाविद्यालयांत 876 पदे रिक्त आहेत. यातील गट अ व गट ब मधील रिक्त पदे सरळसेवेने व पदोन्नतीने भरण्याबाबत कार्यवाही सुरू असून येत्या काळात वैद्यकीय शिक्षण विभागातील सर्व पदे भरली जातील असे आश्वासन वैद्यकीय शिक्षण मंत्री हसन मुश्रीफ यांनी दिले आहे.

राज्यातील सरकारी रुग्णालयांत रिक्त असलेल्या पदांबाबत उपस्थित करण्यात आलेल्या तारांकित प्रश्नाला मंत्री मुश्रीफ यांनी उत्तर दिले आहे. सरळसेवेने आतापर्यंत प्राध्यापक संवर्गातील 91, सहायक प्राध्यापक संवर्गातील 525 पदे भरण्यात आली आहेत. प्राध्यापक संवर्गातील 117 अध्यापकांना पदोन्नतीने नियुक्ती देण्यात आली आहे. तर उर्वरित रिक्त पदे भरण्यात येत आहेत.

गट क संवर्गातील 5180 पदे भरण्याकरिता टीसीएसआयओएन कंपनीकडून स्पर्धा परीक्षा घेण्यात आली. गट ड संवर्गातील पदे जिल्हास्तरीय समितीमार्फत भरण्यात येणार आहेत. त्यानुषंगाने संबंधित संस्थेचे अधिष्ठाता व संबंधित जिल्हाधिकारी यांना सूचना देण्यात आल्या असल्याचे त्यांनी सांगितले.

■ एमपीएससीमार्फत पदे भरणार

● सरकारी आयुर्वेद महाविद्यालयातील सरळसेवेने भरावयाच्या अध्यापक संवर्गातील ११४ रिक्त पदांचे आरक्षण सामान्य प्रशासन विभागाकडून निश्चित करण्यात आले आहे.

● याविषयीची मागणीपत्र महाराष्ट्र लोकसेवा आयोगाला पाठविण्यात आले आहे. ही पदे भरेपर्यंत कंत्राटी तत्वावर पदे भरण्यात येणार आहेत.

■ दंत महाविद्यालयांतील रिक्त पदे : अधिष्ठाता – 8, प्राध्यापक – 245, सहयोगी प्राध्यापक – 400, सहायक प्राध्यापक – 1008, गट क – 7756, गट ड – 3974. एकूण 13391 पदे रिक्त आहेत.

■ सरकारी आयर्वेद महाविद्यालये : अधिष्ठाता – 2, प्राध्यापक – 26, सहयोगी प्राध्यापक – 44, सहायक प्राध्यापक – 86, गट क – 510, गट ड – 210. एकूण – 876 पदे रिक्त आहेत.