ताज्या बातम्या राजकारण राज्य लोकसभा २०२४

Devendra Fadnavis : नाना पटोलेंच्या अपघातानंतर देवेंद्र फडणवीसांचा पटोलेंना फोन

11 April 2024

Devendra Fadnavis : काँग्रेस प्रदेशाध्यक्ष नाना पटोले यांच्या गाडीचा काल अपघात झाला. या अपघातानंतर काँग्रेसकडून भाजपवर अनेक गंभीर आरोप करण्यात आले. या आरोपांवर भाजपने देखील प्रत्यूत्तर देत आरोप फेटाळून लावले. यानंतर आता उपमुख्यमंत्री देवेंद्र फडणवीस (Devendra Fadnavis) यांची प्रतिक्रिया येत आहे. मी स्वतः नाना पटोलेंना फोन केला होता. विचारपूस केली, असे देवेंद्र फडणवीस म्हणाले.

काँग्रेस प्रदेशाध्यक्ष नाना पटोलेंच्या अपघातानंतर काँग्रेस आणि भाजपमध्ये आरोप प्रत्यारोप करण्यात येत होते. यानंतर देवेंद्र फडणवीस (Devendra Fadnavis) म्हणाले की, “मला वाटत नाही की नानाभाऊ घातपात वगैरे काही म्हणतील. मी स्वतः नाना पटोलेंना फोन केला होता. विचारपूस केली. आम्ही वेगवेगळ्या पक्षात असू. पण आम्ही एकमेकांचे शत्रू नाही. वैचारिक सामना हा सातत्याने सुरु असतो. असे ते म्हणाले.

पुढे ते म्हणाले की, नाना पटोले हे आमचे मित्रच आहेत. अपघात झाला आहे आणि त्यांनी मला सांगितलं की मी बचावलो पण अपघात मोठा आहे. महाराष्ट्राच्या राजकारणात अशी परिस्थिती ना उद्भवली आहे ना उद्भवणार आहे. मी त्यांना शुभेच्छा दिल्या आहेत.” असं देवेंद्र फडणवीस म्हणाले.

दरम्यान, काँग्रेस प्रदेशाध्यक्ष नाना पटोले मंगळवारी रात्री उशिरा भंडारा जिल्ह्यात त्यांच्या कारला ट्रकने धडक दिल्याने ते थोडक्यात बचावले होते, त्यानंतर काँग्रेसने पटोले यांच्या जीवे मारण्याचा प्रयत्न असल्याचा गंभीर आरोप केला होता. पटोले हे निवडणूक प्रचार आटोपून परतत असताना कारधा गावाजवळ हा अपघात झाला. यात कोणीही जखमी झाले नाही.