ताज्या बातम्या राजकारण राज्य लोकसभा २०२४

Devendra Fadnavis : कल्याण लोकसभेसाठी देवेंद्र फडणवीसांकडून उमेदवार जाहीर

6 April 2024

Devendra Fadnavis : कल्याण लोकसभा मतदारसंघाबाबत एक महत्वाची बातमी येत आहे. उपमुख्यमंत्री देवेंद्र फडणवीस (Devendra Fadnavis) यांनी कल्याण लोकसभा मतदारसंघातून मुख्यमंत्री एकनाथ शिंदे यांचे चिरंजीव श्रीकांत शिंदे (Shrikant Shinde) यांना उमेदवारी जाहीर केली आहे. त्यामुळे अखेर कल्याणधील सस्पेन्स संपला आहे.

गेल्या काही दिवसांपासून कल्याण लोकसभा जागेवरून शिवसेना आणि भाजपमध्ये तणाव होता. महायुतीतील शिवसेना आणि भाजप या दोन्ही पक्षांनी या जागेवार दावा केला आहे. त्यामुळे कल्याणची जागा कुणाला मिळणार याकडे सर्वांचे लक्ष लागले आहे. अशात उपमुख्यमंत्री देवेंद्र फडणवीस (Devendra Fadnavis) यांनी नागपूरातील एका सभेत कल्याण लोकसभा मतदारसंघातील उमेदवार म्हणून श्रीकांत शिंदेंच्या नावाची घोषणा केली आहे.

कल्याण लोकसभा मतदारसंघातील जागा श्रीकांत शिंदेंऐवजी भाजपला द्यावी, अशी मागणी शुक्रवारी भाजपच्या कार्यकर्त्यांनी वरिष्ठांकडे केली होती. मात्र आज फडणवीसांनी श्रीकांत शिंदे यांच्या नावाची घोषणा केल्याने ठाकरे गटाकडून वैशाली दरेकर राणे आणि महायुतीचे श्रीकांत शिंदे यांच्यात लढत होणार आहे. कल्याणमधील ही लढत दुहेरी होणार असल्याचे दिसत आहे.

दरम्यान, श्रीकांत शिंदे यांच्या उमेदवारीवर भाजपच्या स्थानिक कार्यक्रत्यांमध्ये नाराजी आहे. भाजप आमदार गणपत गायकवाड यांच्या कार्यालयात पदाधिकारी आणि कार्यकर्त्यांची बैठक पार पडली. या बैठकीत शिवसेनेचे उमेदवार श्रीकांत शिँदे यांच्यासाठी काम न करण्याचा निर्णय झाल्याचे सांगितले जात आहे.