Maharashtra politics : अजितदादा आणि प्रकाश आंबेडकरांनी एकत्र यावं, ‘या’ आमदाराची इच्छा

11 October 2024

Maharashtra politics : महाराष्ट्रातील आगामी विधानसभा निवडणुकीच्या पार्श्वभूमीवर राजकीय हालचालींना वेग आला आहे. राष्ट्रवादी काँग्रेसच्या अजित पवार गटाचे आमदार अमोल मिटकरी यांनी केलेल्या वक्तव्यामुळे राजकीय वर्तुळात चर्चा पुन्हा एकदा रंगली आहे.

अमोल मिटकरी यांनी म्हटले की, वंचित बहुजन आघाडीचे अध्यक्ष प्रकाश आंबेडकर आणि राष्ट्रवादी काँग्रेसच्या अजित पवार गटाचे अध्यक्ष अजित पवार यांनी राजकीयदृष्ट्या एकत्र यावे. कारण प्रकाश आंबेडकर हे डॉ. बाबासाहेब आंबेडकर यांचे रक्ताचे आणि वैचारिक वारसदार आहेत, तर अजित पवार हे शिव-शाहू-फुले-आंबेडकर यांच्या विचारांचे वैचारिक वारसदार आहेत. आमदार अमोल मिटकरी म्हणाले आहेत.

मिटकरी पुढे म्हणाले की, दोन्ही नेत्यांनी एकत्र यावे यासाठी पूर्वी काही प्रयत्न झाले होते, परंतु त्यास दोन्ही पक्षांकडून कोणताही प्रतिसाद मिळाला नाही. तरीसुद्धा, या दोन नेत्यांना एकत्र आणण्यासाठी शेवटपर्यंत प्रयत्न करणार असल्याचे आमदार अमोल मिटकरी म्हणाले आहेत..

अकोला येथे 13 ऑक्टोबरला होणाऱ्या धम्मचक्र प्रवर्तन दिनाच्या स्वागतासाठी प्रकाश आंबेडकर आणि अमोल मिटकरी यांचे एकत्रित फोटो असलेले बॅनर लागले आहेत, त्या बॅनरवरून पुन्हा एकदा राजकीय वर्तुळात चर्चा रंगली आहे.

दरम्यान, मंत्रिमंडळाच्या एका बैठकीत उपमुख्यमंत्री अजित पवार अवघ्या दहा मिनिटांतच बाहेर पडल्याची बातमी चर्चेत होती. मात्र, मिटकरींनी यावर प्रतिक्रिया देत सांगितले की, अजितदादा नाराज नाहीत. उलट महाविकास आघाडी आणि शरद पवार गटाकडून अशा चुकीच्या बातम्या पसरवल्या जात आहेत.