Scholarship : बार्टीच्या ७६३ पात्र विद्यार्थ्यांना १०० टक्के अधिछात्रवृत्ती

27 August 2024

मुंबई : बार्टीच्या (Barti) ७६३ पात्र विद्यार्थ्यांना १०० टक्के अधिछात्रवृत्ती (scholarship) देण्याचा महत्त्वपूर्ण निर्णय आज झालेल्या मंत्रिमंडळ बैठकीत घेण्यात आला. मुख्यमंत्री एकनाथ शिंदे यांच्या अध्यक्षतेखाली ही बैठक पार पडली. या निर्णयामुळे विद्यार्थी समुदायात आनंदाची लहर पसरली आहे.

यापूर्वी, अधिछात्रवृत्ती योजनेतील २०२२ च्या विद्यार्थ्यांना ५० टक्के अधिछात्रवृत्ती देण्याचा निर्णय घेण्यात आला होता. परंतु, विद्यार्थ्यांच्या आंदोलनामुळे आणि सारथी व महाज्योती योजनेप्रमाणेच बार्टीच्या विद्यार्थ्यांनाही समान लाभ मिळावा, यासाठी १०० टक्के अधिछात्रवृत्ती देण्याचा निर्णय घेतला गेला. पात्र विद्यार्थ्यांची कागदपत्रे पडताळून आणि शपथपत्र घेऊन त्यांना ही अधिछात्रवृत्ती (scholarship) देण्यात येणार आहे.

या योजनेसाठी सुमारे ३७ कोटी रुपयांच्या खर्चास मान्यता देण्यात आली आहे. विद्यार्थ्यांच्या शिक्षणात आर्थिक अडचणी येऊ नयेत आणि त्यांना गुणवत्तापूर्ण शिक्षण मिळावे, यासाठी सरकारने हा महत्त्वपूर्ण निर्णय घेतला आहे.