भारत जोडो यात्रा काश्मिरात पोहोचली आहे. यादरम्यान संपूर्ण यात्रेत टी शर्ट घालून फिरत असलेल्या काँग्रेस नेते राहुल गांधींनी आज जॅकेट घातले आहे. जम्मू काश्मिरात बर्फवृष्टी सुरु असल्याने त्यांनी हे जॅकेट घातले.कन्याकुमारीपासून सुरुवात केल्यापासून शुक्रवारपर्यंत राहुल संपूर्ण पदयात्रेत फक्त पांढरा टी-शर्ट घालताना दिसत होते.
२६ जानेवारीला होणार सांगता: भारत जोडो यात्रेचा आज १२५ वा दिवस आहे. शिवसेना (उद्धव ठाकरे) नेते खासदार संजय राऊत हे स्थानिक शिवसेना नेत्यांसह राहुल यांच्या यात्रेत सामील झाले आहेत. गुरुवारी ही यात्रा जम्मू-काश्मीरमध्ये दाखल झाली. 26 जानेवारीला राहुल घाटीमध्ये तिरंगा फडकवून त्याची सांगता होण्याची शक्यता आहे. राहुल यांचे लखनपूर येथे ज्येष्ठ काँग्रेस नेते आणि नॅशनल कॉन्फरन्सचे प्रमुख फारुख अब्दुल्ला यांनी स्वागत केले. राहुल हे केंद्रशासित प्रदेशात दाखल झाल्यानंतर त्यांचे स्वागत करण्यात आले. एका जाहीर सभेला संबोधित करताना राहुल गांधी म्हणाले, आज मी घरी आलो आहे. कारण माझे कुटुंब जम्मू-काश्मीरचे आहे.
येथील लोकांच्या वेदना मला समजतात आणि मी तुमचे दु:ख सांगण्यासाठी आलो आहे. भारत जोडो यात्रेचा उद्देश प्रेम आणि करुणा पसरवण्याचा आहे, असेही ते म्हणाले. अब्दुल्ला यांनी शंकराचार्य आणि राहुल गांधी यांच्यात असलेली समानता दाखवून दिली. अनेक वर्षांपूर्वी शंकराचार्यांनी कन्याकुमारी ते काश्मीर अशी यात्रा काढली होती. आणि आज तुम्ही ती करत आहात, असे अब्दुल्ला म्हणाले. ते म्हणाले की, आजचा भारत हा रामाचा भारत किंवा गांधींचा हिंदुस्थान नाही कारण लोक धर्मावर विभागले गेले आहेत. अब्दुल्ला म्हणाले, आम्ही एकत्र राहिलो तर द्वेषावर मात करू शकू.
शिवसेनेला भारत एकसंघ हवा आहे: शिवसेनेचे (यूबीटी) खासदार संजय राऊत शुक्रवारी कठुआ जिल्ह्यात राहुल गांधी यांच्या नेतृत्वाखालील भारत जोडो यात्रेत जम्मू आणि काश्मीरच्या टप्प्यासाठी सामील झाले. पत्रकारांशी बोलताना राऊत म्हणाले की, भारत जोडो यात्रा काश्मीरमध्ये येणे ही मोठी गोष्ट आहे. खरे तर देशाला जोडण्यासाठी येथूनच यात्रेची सुरुवात व्हायला हवी होती. त्यामुळेच मी शिवसेनेकडून यात्रेत आलो आहे. कारण आम्हाला देश एकसंघ हवा आहे.
टी- शर्टवर फिरणाऱ्या राहुल गांधींनी घातले जॅकेट.. संजय राऊतही झाले सहभागी
