ताज्या बातम्या राजकारण राज्य लोकसभा २०२४

Amol Kolhe : शिरूर लोकसभेसाठी डॉ. अमोल कोल्हे यांचा उमेदवारी अर्ज दाखल

18 April 2024

Amol Kolhe : शिरूर लोकसभा मतदार संघात महाविकास आघाडीतर्फे राष्ट्रवादी काँग्रेस शरदचंद्र पवार पक्षाचे उमेदवार डॉ. अमोल कोल्हे (Amol Kolhe) यांनी आज उमेदवारी अर्ज दाखल केला. पुणे, मावळ व शिरूर या तीन लोकसभा मतदारसंघांसाठी उमेदवारी अर्ज दाखल करण्यासाठी आजपासून सुरुवात झाली आहे. महाविकास आघाडीने आज पुण्यात शक्ती प्रदर्शन करत तिन्ही उमेवारांचे अर्ज दाखल केले.

शिरूर लोकसभेसाठी पहिल्याच दिवशी राष्ट्रवादी काँग्रेस शरदचंद्र पवार पक्षाचे विद्यमान खासदार डॉ. अमोल कोल्हे यांनी अर्ज दाखल केला. कोल्हे यांनी आपला अर्ज शिरूर लोकसभा मतदारसंघाचे निवडणूक निर्णय अधिकारी व अतिरिक्त जिल्हाधिकारी अजय मोरे यांच्याकडे सुपुर्द केला.

अमोल कोल्हे यांनी छत्रपती शिवाजी महाराजांना वंदन करून, शिरूर लोकसभा मतदारसंघातील मायबाप जनतेच्या आणि माझ्या आईच्या आशीर्वादाने राष्ट्रवादी काँग्रेस पक्ष- शरदचंद्र पवार पक्षाच्या वतीने महाविकास आघाडीचा अधिकृत उमेदवार म्हणून शिरूर लोकसभा मतदारसंघातून मी ‘तुतारी फुंकणारा माणूस’ या चिन्हावर निवडणूक लढवित आहे, असे कोल्हे म्हणाले.

शिरूर लोकसभा मतदारसंघातील मायबाप जनतेच्या आशीर्वादाने मला पुन्हा लोकसभेत प्रतिनिधीत्व करण्याची संधी मिळेल हा विश्वास आहे म्हणत शेतकरी बांधवांच्या हक्कांसाठी, माता भगिनींच्या सन्मानासाठी, युवकांच्या भविष्यासाठी आणि महाराष्ट्राच्या स्वाभिमानासाठी मी अविरतपणे संघर्ष करत आहे. या संघर्षाला मायबाप जनतेचं पाठबळ नक्की मिळेल असा विश्वासही कोल्हे यांनी व्यक्त केला.

पुणे विधानभवन येथे निवडणूकीचा उमेदवारी अर्ज दाखल करते वेळी खा.सुप्रिया सुळे, माजी मंत्री बाळासाहेब थोरात, माजी राज्यमंत्री विश्वजित कदम, आ.अशोकबापु पवार, आ.सचिन अहिर, आ.संजय जगताप, आ. संग्राम थोपटे, माजी आ. महादेव बाबर, उपमुख्यमंत्री अजितदादा पवार यांचे बंधू श्रीनिवास पवार यांचे पुत्र युगेंद्र पवार हे देखील उपस्थित होते.

दरम्यान, त्याच वेळी बारामती लोकसभेसाठी महाविकास आघाडीच्या उमेदवार सुप्रिया सुळे आणि पुणे लोकसभेचे उमेदवार रवींद्र धंगेकर यांनीही उमेदवारी अर्ज दाखल केला.