Tushar Gandhi : वंचितला मतदान न करण्याचे महात्मा गांधींच्या पणतूचे आवाहन

13 April 2024

Tushar Gandhi : महात्मा गांधीचे पणतू तुषार गांधी यांनी वंचित बहुजन आघाडीवर टीका करत वंचितला मतदान न करण्याचे आवाहन केले आहे. तुषार गांधी (Tushar gandhi) म्हणाले, महाराष्ट्रात वंचित बहुजन आघाडी (Vanchit Bahujan Aghadi) आणि एमआयएम( MIM) ही भाजपची (BJP) बी टीम म्हणून काम करत आहेत. त्यामुळे त्यांना मतदान करू नका, असे आवाहन महात्मा गांधी यांचे पणतू तुषार गांधी यांनी जनतेला केलं आहे.

तुषार गांधी हे पत्रकारांशी बोलताना म्हणाले की, राष्ट्रीय पातळीवर सध्या इंडिया विरुद्ध एनडीए अशी लढत होत आहे, तर राज्यात महाविकास आघाडी विरुद्ध महायुती असा सामना होत आहे. असे असताना वंचित बहुजन आघाडीनं वेगळी चूल मांडल्यानं पुरोगामी विचारांच्या पक्षांना काही प्रमाणात फटका बसू शकतो, अशी शक्यता तुषार गांधी यांनी व्यक्त केली. यावेळी त्यांनी वंचितला मतदान करू नका, असे आवाहन केले.

तुषार गांधींच्या या आरोपांवर वंचितचे अध्यक्ष प्रकाश आंबेडकरांनीही (Prakash Ambedkar) प्रत्युत्तर दिले आहे. प्रकाश आंबेडकरांनी सोशल मीडिया लिहले की, तुम्ही अलीकडे केलेले विधान अत्यंत चुकीचे, कोणताही आधार नसलेले आणि वंचित बहुजनांच्या राजकारणात अडथळा निर्माण करणारे आहेच; पण संसदीय लोकशाही आणि स्वतंत्र राजकीय नेतृत्वासाठीच्या प्रयत्नांना, तसेच वर्ग, जात आणि धर्माच्या पलीकडे जावून सुरू असलेल्या सर्वसमावेशक राजकारणाला नाकारणारे आहे. तुमच्या आजोबांची ब्रिटिशांविरुद्धची चळवळ सर्वसमावेशक होती, पण तुमचे विचार आणि राजकारणामध्ये तशी स्पष्टता दिसत नाही. महाविकास आघाडीने वंचित बहुजन आघाडीसोबत कसा व्यवहार केला हे तुम्हाला माहिती नाही का? त्यांचे राजकारण किती अलिप्त आहे हे तुम्हाला माहीत नाही का? महाविकास आघाडी आणि भाजपच्या नेत्यांमध्ये झालेली तडजोड तुम्हाला माहिती नाही का? असा सवाल केला आहे.

तसेच, त्यांनी पुढे म्हटले आहे की, जर तुमच्याकडे राजकीय ज्ञान आणि समज नसेल, तर कृपया निरर्थक गोष्टी करण्यात आणि निराधार आरोप करण्यात तुमचा वेळ घालवू नका. काळच सत्य परिस्थिती समोर आणेल. खरं तर, आताच सगळे संकेत दिसत आहेत. पण, तुम्ही डोळे झाकल्यासारखे संदर्भहीन ज्याला काहीही आधार नाही असे वक्तव्य करून जनतेमध्ये संभ्रम निर्माण करीत आहात.

वंचित बहुजन आघाडीचे प्रवक्ता सिद्धार्थ मोकळे यांनी आम्ही छातीठोकपणे सांगतोय की, आम्ही कालही भाजपसोबत नव्हतो, आजही नाही. भविष्यातही आम्ही भाजपसोबत जाऊ शकत नाही. या पद्धतीने वंचितांच्या राजकारणाला बदनाम करणे तुषार गांधींनी थांबवले पाहिजे, असे म्हटले आहे.