रायगड : रायगड जिल्ह्यात एक खळबळजनक बातमी समोर येत आहे. रायगडमधील श्रीवर्धन येथे संशयास्पद बोट आढळून आली असून या बोटीमध्ये तीन एके-47 आढळले आहेत. यामुळे परिसरात एकच खळबळ उडाली. तसेच पोलिसांनी अलर्ट जारी केला आहे.
रायगड जिल्ह्यात हरिहरेश्वर किनाऱ्यावर सकाळी मच्छिमारांना संशयास्पद स्थितीत एक बोट आढळून आली. ही बोट स्पीड बोट असल्याचे समोर आले आहे. या बोटीमध्ये AK 47 बंदुका त्याशिवाय काही काडतूसं आणि लाइफजॅकेट व इतर साहित्य आढळून आले आहे. या संशयास्पद बोटीने यामागे काही घातपाताचा कट होता का, असा प्रश्न उपस्थित करण्यात येतो आहे. या घटनेनंतर रायगड जिल्हा प्रशासन आणि पोलीस घटनास्थळी दाखल झाले आहेत.
दरम्यान, ही स्पीड बोट सापडली त्यावेळी या स्पीड बोटीत कोणताही माणूस नव्हता. ही बोट भरकटून किनाऱ्याजवळ आल्याची शक्यता देखील वर्तवण्यात येत आहे. या बोटीत सापडलेल्या बॉक्सवर नेपच्यून मेरीटाईम सिक्युरिटी असे स्टीकर आढळून आल्याची माहिती मिळत आहे.