चार दिवसात सोयाबीनला अपेक्षित दर मिळेल ; भाजपच्या ‘या’ नेत्याची घोषणा

8 November 2024

Soybean Price : विधानसभा निवडणुकीच्या प्रचाराच्या पार्श्वभूमीवर परांडा येथे आयोजित महायुतीच्या सभेत भाजप नेते व कृषी मूल्य आयोगाचे अध्यक्ष पाशा पटेल यांनी शेतकऱ्यांच्या सोयाबीन पिकाला योग्य दर देण्याचे आश्वासन दिले आहे. यामुळे शेतकऱ्यांना मोठा दिलासा मिळण्याची शक्यता आहे.

सभेत पाशा पटेल यांनी शेतकऱ्यांच्या मनातील नाराजी जाणून घेत केंद्रीय मंत्री अमित शाह यांची भेट घेतल्याचे सांगितले. “सध्या सोयाबीनला कमी दर मिळत असल्याने शेतकऱ्यांमध्ये अस्वस्थता आहे. परंतु आता येत्या चार दिवसांत सोयाबीनला अपेक्षित दर मिळेल,” असे पटेल यांनी ठामपणे सांगितले.

यावेळी मुख्यमंत्री एकनाथ शिंदे यांनी महायुतीचे परांडा मतदारसंघातील उमेदवार तानाजी सावंत यांच्या कामाची प्रशंसा करताना, “तानाजी सावंत हे प्रेमापोटी जनतेला सोबत घेऊन कार्यरत आहेत,” असे मुख्यमंत्री एकनाथ शिंदे म्हणाले “तानाजी सावंत हे परांडा किल्ल्याचे राखणदार असून त्यांच्या प्रेमापोटी जनतेने या सभेला हजेरी लावली आहे,” असे शिंदे म्हणाले. त्यांनी सावंत यांना “जादूगार” संबोधत त्यांच्या कामगिरीचे कौतुक केले.

भाजप नेते पाशा पटेल यांच्या या घोषणेमुळे राज्यातील सोयाबीन उत्पादक शेतकऱ्यांना दिलासा मिळाला असून, आता चार दिवसांत सोयाबीनला हमीभाव मिळण्याची अपेक्षा वाढली आहे.