PCMC : निगडी पर्यंत मेट्रो विस्तारीकरण सुरू, शहरवासीयांची स्वप्नपूर्ती – महेश लांडगे

26 May 2024

पिंपरी चिंचवड / क्रांतीकुमार कडुलकर : पिंपरी ते निगडी भक्ती-शक्ती चौकापर्यंत मेट्रोच्या कामाला सुरूवात झाली आहे. हा मार्ग 4.4 किमीचा असून पूर्णपणे उन्नत मार्ग आहे. यामुळे स्वारगेट ते पीसीएमसी कॉरिडॉर हा निगडीपर्यंत विस्तारित होणार आहे. गेल्या पावणे दोन वर्षांपासून महाराष्ट्रात पंतप्रधान नरेंद्र मोदी यांच्या मार्गदर्शनाने मोठ्या प्रमाणावर विकास कामे सुरू आहेत. रेल्वे आणि मेट्रोसाठी सुद्धा राज्यासाठी मोठ्या प्रमाणावर तरतूद करण्यात आली आहे ज्याचा फायदा नागरिकांना होत आहे. PCMC metro

पिंपरी-चिंचवडकरांची स्वप्नपूर्ती

‘‘पुणे-पिंपरी-चिंचवड मेट्रोचे काम पिंपरीपर्यंत ज्या वेगात सुरू आहे. त्याच वेगात निगडीपर्यंत होईल..’’ असे आश्वासन राज्याचे नेते तथा उपमुख्यमंत्री देवेंद्र फडणवीस यांनी दिले होते.

आज निगडीपर्यंतच्या मेट्रोच्या कामाला सुरूवात झाली. ही पिंपरी-चिंचवडकरांची खऱ्या अर्थाने स्वप्नपूर्ती आहे. दिवंगत आमदार लक्ष्मण जगताप यांची यानिमित्ताने आठवण झाली. देवेंद्र फडणवीस यांनी दिलेला शब्द खरा ठरला. पिंपरी-चिंचवड (pcmc) शहरातील सार्वजनिक प्रवासी वाहतूक व्यवस्था सक्षम करण्याच्या दृष्टीने हा प्रकल्प अत्यंत महत्त्वाकांक्षी आहे. यासोबतच आगामी काळात हिंजवडी-वाकड-पिंपळे सौदागर- भोसरी-चाकण असा मेट्रो विस्तारासाठी प्रयत्नशील राहणार आहोत. तमाम पिंपरी-चिंचवडकरांच्या वतीने राज्य व केंद्रातील महायुती सरकारचे मन:पूर्वक आभार व्यक्त करतो.

– महेश लांडगे, आमदार, भोसरी विधानसभा, भाजपा, पिंपरी-चिंचवड.