Junnar : घुणी-भांडी व मजूर कामगारांची ऑनलाईन नोंदणी

17 April 2024

Junnar : डाॅ.बाबासाहेब आंबेडकर यांच्या जयंती निमित्ताने प्रहार रूग्ण सेवक व श्री राधेश्याम दिव्यांग सशक्तिकरण केंद्राच्या वतीने धुणी-भांडी व मजूर कामगार यांची ऑनलाईन नाव नोंदणी सुरूवात करण्यात आली आहे. या नाव नोंदणीस उत्स्फूर्त प्रतिसाद मिळाला आहे. यावेळी 640 कामगारांची नोंदणी केल्याची माहिती संस्थापक अध्यक्ष दीपक चव्हाण यांनी दिली. (Junnar)

संघटनेच्या वतीने अध्यक्ष अरूण शेरकर व महिला अध्यक्षा नफिसा इनामदार याच्या मार्गदर्शनाखाली घुणी-भांडी व मजूर कामगार संघटीत करून त्यांना त्यांच्या हक्क मिळवून देण्यासाठी नाव नोंदणी सुरू करण्यात आली आहे. कामगारांनी नाव नोंदणी करून शासनाच्या विविध योजनांचा लाभ घ्यावा, असे आवाहन करण्यात आले आहे.

नाव नोंदणीसाठी घुणी-भांडी व मजूर कामगारांचे वय 18 वर्ष पेक्षा अधिक असावे. वाढपी, आचारी, साफसफाई, घुणी-भांडी करणारे, खाजगी दवाखाने, दुकान, हाॅल, हॉटेल, धार्मिक स्थळे इत्यादी साफसफाई करणारे कामगार यांनी नाव नोंदणी करून घ्यावी, असे आवाहन केले आहे.

घुणीभांडी व मजूर कामगार म्हणून ऑनलाईन नोंदणी करण्याकरिता ज्या ठिकाणी कामगार काम करत आहे, अशा घरमालक किंवा संस्थेने आमच्या येथे काम करतो, म्हणून दाखला द्यावा लागतो. मात्र, असा दाखला दिला जात नाही. यामुळे चव्हाण यांनी संस्थेच्या वतीने जबाबदारी घेवून धुणीभांडी व मजूर कामगार यांना दाखला देऊन सहकार्य केले आहे.

यासाठी लोकसेवा केंद्राचे मिलिंद खरात याची ऑनलाईन नोंदणीसाठी मदत झाली. यावेळी संस्थेचे उपाध्यक्ष राहुल मुसळे, सुनिल जंगम, चंद्रकला पोपळघट, संस्थेचे मार्गदर्शक नरसिंग कलोसिया, महिला उपाध्यक्षा रजनी शहा, सचिव शमिम सय्यद, गायत्री गिरी, मंगेश साळवे, अश्विनी साळवे, गोरक्ष नरवीर उपस्थित होते.