ताज्या बातम्या राजकारण राज्य लोकसभा २०२४

मोठी बातमी : भांडूपमध्ये पैशाने भरलेली गाडी पोलिसांच्या हाती, राज्यभरात खळबळ

28 April 2024

Bhandup : देशभरात लोकसभा निवडणुकीची आचारसंहिता सुरु आहे. लोकसभा निवडणुकीच्या काळात गैरप्रकार टाळण्यासाठी निवडणूक आयोग चांगलीच काळजी घेत आहे. या आचारसंहिता काळात रोकड रक्कम नेण्यावर निर्बंध आहेत. देशातील विविध भागातून निवडणूक आयोगाने रोकड रक्कम ताब्यात घेतल्याच्या बातम्या येत आहे. असे असताना आता थेट पैशाने भरलेली गाडी निवडणूक आयोगाच्या भरारी पथकाच्या हाती लागली आहे. या बातमीने राज्यभरात खळबळ उडाली आहे.

भांडूप (Bhandup) येथील सोनापूर सिग्नलवर शनिवारी रात्री एकच्या सुमारास नाकाबंदी सुरू होती. त्यावेळी गाड्यांची तपासणी करताना एका गाडीत मोठ्याप्रमाणावर रोकड (Cash Seized) आढळून आली. सोनापूर सिग्नलवर गाडीत आढळून आलेली रक्कम ही जवळपास तीन ते साडेतीन कोटींच्या घरात असल्याचे समजते. सध्या अधिकाऱ्यांकडून नोटांची मोजणी सुरू असून या प्रकरणात चौकशी सुरु झाली आहे.

दरम्यान, या गाडीत रोख रक्कम असल्याचे समजल्यानंतर ही गाडी तात्काळ भांडूप पोलीस ठाण्यात नेण्यात आली. ही रक्कम जवळपास साडेतीन कोटींच्या घरात असल्याचे कळाल्यानंतर आयकर विभागाचे कर्मचारी पोलीस ठाण्यात दाखल झाले. निवडणूक आयोगाच्या भरारी पथकाने पकडलेली गाडी ही एटीएमचे पैसे वाहतूक करणाऱ्या गाडीसारखी आहे.

महाराष्ट्रात गेल्या ४४ दिवसांत ४० कोटींची रक्कम पकडली आहे. ६९.३८ कोटींचे मौल्यवान धातू जप्त केले आहेत. ३५ लाख लिटर दारु, ७९.८७ कोटींच्या अन्य वस्तू असा ४३१.३४ कोटींचा मुद्देमाल जप्त केला आहे. निवडणूक आयोगाच्या भरारी पथकाकडून ही धडक कारवाई केली जात आहे.

निवडणूक आयोगाने केलेल्या या कारवाईतील गाडीतील रक्कम कुणाची आहे, कुठे घेऊन चालले होते. यासंदर्भात काहीच उत्तरे गाडी चालकाने दिली नाही. या प्रकरणाचा तपास सध्या पोलिस करत आहे.