इंदापूरमध्ये राष्ट्रवादीचे दोन गट आमने-सामने?

23 October 2024

Vidhansabha election : विधानसभा निवडणुकीच्या पार्श्वभूमीवर महाराष्ट्रातील राजकीय वातावरण अधिकाधिक तापत आहे. आता राष्ट्रवादी काँग्रेसचे अजित पवार आणि शरद पवार गट एकमेकांसमोर उभे ठाकण्याची शक्यता निर्माण झाली आहे. नुकत्याच जाहीर झालेल्या अजित पवार गटाच्या पहिल्या उमेदवारी यादीमध्ये इंदापूर विधानसभा मतदारसंघातून विद्यमान आमदार दत्तात्रय भरणे यांना पुन्हा एकदा संधी देण्यात आली आहे.

इंदापूर मतदारसंघात हर्षवर्धन पाटील आणि दत्तामामा भरणे यांच्यात याआधी दोनवेळा लढती झाल्या आहेत. आता तिसऱ्यांदा या दोन राजकीय दिग्गजांमध्ये जोरदार सामना रंगण्याची शक्यता आहे. खास बाब म्हणजे, हर्षवर्धन पाटील यांनी काही दिवसांपूर्वीच शरद पवार गटात प्रवेश केला आहे. त्यामुळे शरद पवार गटाकडून हर्षवर्धन पाटलांना उमेदवारी मिळण्याची शक्यता दाट आहे.

अजित पवार गटाने नुकत्याच जाहीर केलेल्या 38 उमेदवारांच्या पहिल्या यादीत अनेक बड्या नेत्यांना स्थान देण्यात आले आहे. यामध्ये धनंजय मुंडे यांना परळीतून, दिलीप वळसे पाटील यांना आंबेगावमधून आणि आशुतोष काळे यांना कोपरगावमधून उमेदवारी देण्यात आली आहे. परंतु सर्वाधिक चर्चेत असलेला इंदापूर मतदारसंघ अजित पवार गटासाठी महत्वाचा आहे. दत्तामामा भरणे यांना पुन्हा संधी देण्यात आल्याने अजित पवार गट इंदापूर मतदारसंघावर आपली पकड कायम ठेवण्याचा प्रयत्न करणार आहे.

हर्षवर्धन पाटील यांना शरद पवार गटात प्रवेश मिळाल्याने, इंदापूरमध्ये आता राष्ट्रवादी काँग्रेसचे दोन गट एकमेकांसमोर उभे ठाकतील. अजित पवार गटाकडून दत्तात्रय भरणे, तर शरद पवार गटाकडून हर्षवर्धन पाटील असा सामना होण्याची शक्यता आहे. त्यामुळे या मतदारसंघात असा सामना रंगणार असून, आगामी विधानसभा निवडणूक अधिकच रंगतदार होणार आहे.

अजित पवार गट विरुद्ध शरद पवार गट असा सामना आगामी निवडणुकीत रंगणार आहे. त्यामुळे या मतदारसंघात असा सामना रंगणार असून, आगामी विधानसभा निवडणूक अधिकच रंगतदार होणार आहे.