मोठी बातमी : दाना चक्रीवादळ आज धडकण्याची शक्यता, महाराष्ट्रावर होणार का परिणाम?

23 October 2024

Weather News : दिवाळी अवघ्या काही दिवसांवर आली असून, महाराष्ट्रात हवामानामध्ये बदल दिसून येत आहे. आज राज्यातील काही भागांमध्ये पावसाचा इशारा हवामान खात्याने दिला आहे. विशेषत: कोकण, मध्य महाराष्ट्र, आणि मराठवाड्यात पुढील 24 तासांमध्ये वादळी वारे आणि पावसाचा इशारा देण्यात आला आहे. कोकण विभागात वादळी वाऱ्यांसह मुसळधार पाऊस होण्याची शक्यता वर्तवली जात आहे, तर दक्षिण महाराष्ट्रात यलो अलर्ट जारी केला आहे. हवामान खात्याने या भागांमध्ये ताशी 30 ते 40 किमी वेगाने वारे वाहण्याची शक्यता वर्तवली आहे.

याशिवाय, रत्नागिरी, सिंधुदुर्ग, कोल्हापूर आणि साताऱ्यातील घाटमाथ्यावर तापमान घटण्याची शक्यता असून वातावरणात थंडी जाणवण्याचा अंदाज व्यक्त करण्यात आला आहे. मात्र मुंबईत उन्हाचा कडाका अधिक जाणवणार आहे.

आज ‘दाना’ चक्रीवादळ ओडिशा आणि पश्चिम बंगालच्या किनारपट्टी भागांवर धडकण्याची शक्यता आहे. चक्रीवादळाचा परिणाम मुख्यत्वे या भागांवर दिसून येईल. याशिवाय आज रात्रीपर्यंत हे चक्रीवादळ रौद्र रूप धारण करणार असल्याचं सांगण्यात आलं आहे.महाराष्ट्रावर या चक्रीवादळाचा मोठा परिणाम होणार नाही, मात्र हवामान खात्याने समुद्रकिनारी असलेल्या लोकांना ,मच्छीमारांना सतर्क राहण्याचा इशारा दिला आहे. ओडिशा आणि पश्चिम बंगालमध्ये 24 आणि 25 ऑक्टोबर रोजी या चक्रीवादळाचा लँडफॉल होण्याची शक्यता आहे.

यामुळे हवामान खात्याने किनारपट्टी भागात समुद्रात मोठ्या लाटा उसळण्याचा इशारा दिला असून, नौकांना समुद्रात उतरण्यापासून सावध राहण्याची सूचना करण्यात आली आहे.