मोठी बातमी : नितिश कुमार यांना मोदी सरकारचा मोठा झटका

23 July 2024

Rejection special state status Bihar : बिहार सरकारने गेल्या अनेक दिवसांपासून राज्याला विशेष राज्याचा दर्जा देण्याची मागणी केली होती. मात्र, एनडीए सरकारने या मागणीला स्पष्ट नकार दिला आहे. बिहारला विशेष राज्याचा दर्जा मिळावा, अशी मागणी बिहारचे मुख्यमंत्री नितीश कुमार (Nitish Kumar) यांनी सातत्याने केली होती, परंतु एनडीए सरकारच्या या निर्णयाने त्यांचे प्रयत्न निष्फळ ठरले आहेत.

बिहारमधील जेडीयू खासदार रामप्रित मंडल यांनी संसदेत विचारलेल्या एका प्रश्‍नाला उत्तर देताना, अर्थ खात्याचे राज्यमंत्री पंकज चौधरी यांनी बिहारला विशेष राज्याचा दर्जा देण्याचा सरकारचा कोणताही विचार नाही, असे स्पष्ट केले. एनडीए सरकारच्या या भूमिकेवर आता जेडीयू पक्षाचे नेते नितीश कुमार (Nitish Kumar) काय निर्णय घेतात, हे पाहणे रंजक ठरणार आहे.

बिहारला विशेष राज्याचा दर्जा का महत्त्वाचा?

बिहार हे आर्थिक मागासलेले राज्य आहे, आणि विशेष राज्याचा दर्जा मिळाल्यास राज्याला विविध आर्थिक सवलती आणि केंद्रीय मदतीचा लाभ होऊ शकतो. त्यामुळे राज्यातील विकास प्रक्रिया जलद होण्यास मदत होईल, असे नितीशकुमार यांचे म्हणणे आहे.

राजकीय समीकरणे आणि पुढील वाटचाल (Nitish Kumar)

सध्या एनडीए सरकारला पूर्ण बहुमत नाही आणि त्यांना जेडीयूच्या पाठिंब्याची आवश्यकता आहे. त्यामुळे नितीशकुमार यांनी बिहारला विशेष राज्याचा दर्जा मिळवून देण्याची अपेक्षा व्यक्त केली होती. परंतु एनडीए सरकारने त्यांच्या मागणीला वाटाण्याच्या अक्षता लावल्यामुळे जेडीयू पक्षाचे भविष्यातील पाऊल काय असेल, याकडे सर्वांचे लक्ष लागले आहे.

एनडीए सरकारच्या या निर्णयामुळे बिहारला अपेक्षित असलेली आर्थिक मदत आणि सवलती मिळण्याची शक्यता धुसर झाली आहे. राज्यातील नागरिक आणि नेत्यांमध्ये या निर्णयामुळे नाराजीचे वातावरण पसरले आहे. नितीशकुमार आणि जेडीयू पक्षाची पुढील रणनीती काय असेल, याची सर्वांना उत्सुकता आहे.