Kolhapur : ६ हातभट्ट्यांवर एलसीबीची छापेमारी

27 May 2024

Kolhapur (यश रुकडीकर) : कोल्हापूर जिल्ह्यात सध्या अवैध व्यवसायांचा सुळसुळाट झाला आहे. अशा अवैध व्यवसायांना आळा घालण्यासाठी तपास करून त्यांच्यावर कठोर कारवाई करण्याचे आदेश पोलीस अधीक्षक महेंद्र पंडित यांनी पोलीस अधिकाऱ्यांना दिले होते. (Kolhapur)

स्थानिक गुन्हे अन्वेषण शाखेचे पथक तपास करत असताना स्थानिक गुन्हे अन्वेषण शाखेचे पोलीस निरीक्षक रवींद्र कळमकर यांना माहिती मिळाली की मोतीनगर, कंजारभाट वसाहत, एसएससी बोर्डाच्या जवळ, कोल्हापूर येथे पहाटेच्या वेळी गावठी हातभट्टीची दारू तयार केली जाते. प्राप्त माहितीनुसार स्थानिक गुन्हे अन्वेषण शाखेचे पोलीस निरीक्षक रवींद्र कळमकर यांच्या मार्गदर्शनाखाली पोलिस उपनिरीक्षक शेष मोरे व इतर पोलिसांच्या पथकाने दि.२६ रोजी पहाटे छापेमारी करून ६ हातभट्ट्या नष्ट केल्या.

सदर ठिकाणी अशा प्रकारची दारू तयार करण्यासाठी लागणारे ९०० लिटर कच्चे रसायन,१८० लिटर पक्के रसायन,१२० लिटर तयार दारू व इतर साहित्य असा एकूण ५०,७०० रुपये किमतीचा मुद्देमाल जप्त करून जागीच नष्ट करण्यात आला. सदर गुन्ह्याबद्दल १ इसम व ५ महिला सर्व राहणार मोतीनगर, कंजारभाट वसाहत यांच्याविरुध्द राजारामपुरी पोलिस ठाण्यात गुन्हा दाखल केला आहे.

सदर कारवाई स्थानिक गुन्हे अन्वेषण शाखेचे पोलीस निरीक्षक रवींद्र कळमकर, उपनिरीक्षक शेष मोरे, खंडेराव कोळी, चंदू ननवरे, शहनाज कनवाडे, अमर आडुळकर, युवराज पाटील, अमित मर्दाने, अशोक पवार, वसंत पिंगळे, दिपक घोरपडे, ओंकार परब, सोमराज पाटील आदींनी केली.