मोठी बातमी : पेट्रोल आणि डिझेलच्या किंमतीत घट, अर्थमंत्र्यांची मोठी घोषणा !

28 June 2024

Petrol diesel : महाराष्ट्र राज्याचे उपमुख्यमंत्री तथा अर्थमंत्री अजित पवार यांनी आज मांडलेल्या अर्थसंकल्पात राज्यातील जनतेला मोठा दिलासा दिला आहे. पेट्रोल आणि डिझेलच्या किंमतीत घट करण्याची घोषणा करत त्यांनी जनतेच्या हिताचे पाऊल उचलले आहे. अजित पवार यांनी सादर केलेल्या अतिरिक्त अर्थसंकल्पात पेट्रोल आणि डिझेल वरील मुल्यवर्धित कर राज्यभरात समान करण्याची तरतूद केली आहे. त्यामुळे सर्वसामान्य नागरिक तसेच उद्योग आणि व्यापार क्षेत्राला दिलासा मिळणार आहे. (Petrol diesel)

पेट्रोल आणि डिझेलवरील मुल्यवर्धित कर राज्यभरात समान करण्याच्यादृष्टीने बृहन्मुंबई, ठाणे आणि नवी मुंबई या महानगरपालिका क्षेत्रातील डिझेलवरील सध्याचा कर २४ टक्क्यांवरुन २१ टक्के प्रस्तावित करण्यात आला आहे. तसेच पेट्रोलचा सध्याचा कर २६ टक्के अधिक प्रति लिटर पाच रुपये बारा पैसे वरुन २५ टक्के अधिक प्रति लिटर पाच रुपये बारा पैसे करण्याचे प्रस्तावित केले आहे.

यामुळे सर्वसामान्य नागरिक तसेच उद्योग व व्यापार क्षेत्राला दिलासा मिळणार आहे. या बदलामुळे ठाणे, बृहन्मुंबई आणि नवी मुंबई या महानगरपालिका क्षेत्रातील पेट्रोलचा दर अंदाजे ६५ पैसे आणि डिझेलचा दर अंदाजे २ रुपये ७ पैसे प्रति लिटर स्वस्त होणार आहे.

सर्वसामान्य नागरिकांना दिलासा Petrol diesel Price

या निर्णयामुळे राज्यातील वाहतूकदार, शेतकरी आणि सर्वसामान्य नागरिकांना मोठा दिलासा मिळणार आहे. पेट्रोल आणि डिझेलच्या किंमतीत झालेल्या घटेमुळे महागाईच्या दबावातून थोडी मोकळीक मिळेल, असा अंदाज व्यक्त करण्यात येत आहे.