कोल्हापूर(प्रतिनिधी):- स्टुडंट्स फेडरेशन ऑफ इंडिया कोल्हापूर जिल्हा कमिटीच्या वतीने विद्यार्थ्यांची शिष्यवृत्ती त्वरीत द्या, स्वधार योजनतेतील रक्कम त्वरित खात्यावर जमा करा आदी मागण्यांना घेऊन कोल्हापूर शहरात विविध भागात घराजवळ उभे राहून आंदोलन करण्यात आले.
स्टुडंट्स फेडरेशन ऑफ इंडिया (एसएफआय)ने लॉकडाऊन काळात सरकारकडे सतत मागणी केली की, राज्यातील सर्व समाज घटकातील, सर्व अभ्यासक्रमाच्या विद्यार्थ्यांना त्यांच्या हक्काची शिष्यवृत्ती वितरित करा. तरीदेखील सरकारने या मुद्द्याकडे लक्ष दिलेले नाही. म्हणून एसएफआयने आज १ जून रोजी राज्यभरात एकाच दिवशी आंदोलन करण्याची हाक सर्व विद्यार्थ्यांना आणि संघटनेच्या जिल्हा समित्यांना दिली होती. या आंदोलनाला राज्यभरातून सकारात्मक प्रतिसाद देत, विद्यार्थ्यांनी हातात फलक घेऊन मागणी केली.
आंदोलनाला कोल्हापूर, बीड, नांदेड, औरंगाबाद, सोलापूर, उस्मानाबाद, सांगली, अमरावती, बुलढाणा, पुणे, ठाणे, पालघर आदी जिल्ह्यात हे आंदोलन झाले.
एसएफआयने १८ एप्रिल आणि २५ मे रोजी राज्याचे मुख्यमंत्री आणि सामाजिक न्याय मंत्री यांना ईमेलद्वारे निवेदन पाठवले होते. परंतु अजूनही शिष्यवृत्ती जमा झालेली नाही. मागील शैक्षणिक वर्ष २०१९-२० संपले असूनही विद्यार्थ्यांना शिष्यवृत्तीचे वितरण न होणे, हे सामाजिक न्याय विभागाच्या ढिसाळ नियोजनाचे लक्षण असल्याचे म्हटले आहे. लॉकडाऊनमध्ये विद्यार्थ्यांना अनेक समस्यांचा सामना करावा लागत आहे. अशा परिस्थितीत मागास घटकातील विद्यार्थ्यांना शिष्यवृत्ती म्हणजे दिलासा देणारी बाब आहे. म्हणून किमान या संकटाच्या काळात तरी सरकारने शिष्यवृत्तीचे वेळेत वाटप करणे आवश्यक होते. परंतु तसे झालेले नाही. म्हणून एसएफआयच्या वतीने हे आंदोलन करण्यात आले.
उद्या एसएफआय दुसऱ्या टप्प्यातील आंदोलन करणार आहे. दिनांक २ जुन रोजी सकाळी ११ वाजेपासून सामाजिक न्याय मंत्र्यांना राज्यातील विद्यार्थी मेसेज करतील. आणि त्यातून शिष्यवृत्ती वाटप करण्याची मागणी करतील. तसेच त्याच दिवशी संध्याकळी ५ ते ७ यावेळेत ट्विटरवर हॅशटॅगचा वापर करून एक मोहीम चालवली जाणार आहे.
यामध्ये राज्यातील सर्व विद्यार्थ्यांनी आणि एसएफआयच्या सर्व कार्यकर्त्यांनी मोठ्या प्रमाणात सहभागी व्हावे. असे आवाहन एसएफआय कोल्हापूर जिल्हा कमिटीने केले आहे.
या आंदोलनात एसएफआय राज्य सचिवमंडळ सदस्य नवनाथ मोरे, जिल्हा अध्यक्ष सर्वेश सवाखंडे, जिल्हा सचिव रत्नदिप सरोदे, जिल्हा कमिटी सदस्य विनय कोळी आदीसह विद्यार्थ्यांनी सहभाग घेतला.