परंपरागत ग्रामीण/शहरी हस्त कारागिरांच्या उन्नतीसाठी १३ हजार कोटींची विश्वकर्मा योजना जाहीर
नवी दिल्ली : पंतप्रधान नरेंद्र मोदी यांनी लाल किल्ल्यावर राष्ट्राला संबोधित करताना आवेशपूर्ण भाषणात देश येत्या पाच वर्षात पहिल्या तीन जागतिक अर्थव्यवस्थेमध्ये पदार्पण करणार असल्याचा विश्वास दिला. या देशातील गोरगरीब माता भगिनींना मालकीची सरकारी घरे देऊन देशात २ कोटी महिलांना लखपती दिदी बनवणार आहेत. देशातील बारा बलुतेदार ओबीसी समाजातील परंपरागत हस्त कारागिरांसाठी पंतप्रधानांनी १३ हजार कोटी रुपयांची पीएम विश्वकर्मा योजना जाहीर केली.
येत्या विश्वकर्मा जयंती पासून या योजनेची अंमलबजावणी होणार आहे. या सर्वांना पीएम विश्वकर्मा प्रमाणपत्र आणि ओळखपत्राद्वारे ओळख दिली जाईल. तसेच ५ टक्के सवलतीच्या व्याज दराने पहिल्या टप्प्यात रुपये १ लाखपर्यंत आणि दुसऱ्या टप्प्यात रुपये २ लाखपर्यंत कर्ज पुरवठा केला जाईल.
त्याशिवाय, ही योजना कौशल्य श्रेणी सुधारणा, अवजारांसाठी प्रोत्साहनपर अर्थसहाय्य, डिजिटल व्यवहार आणि विपणन सहाय्यासाठी प्रोत्साहन देईल. ही योजना देशाच्या ग्रामीण आणि शहरी भागातील हस्त-कलाकार आणि कारागिरांना मदत करेल. पीएम विश्वकर्मा योजनेच्या पहिल्या टप्प्यात एकूण १८ पारंपरिक व्यवसाय असणार आहेत.
यामध्ये सुतार, मच्छिमार होडी बांधणी कारागीर, चिलखत बनवणारे, लोहार, हातोडी, कृषी अवजार, कुलूप चावी, सोनार, दगडी शिल्प, मूर्ती कलाकार, कुंभार, पाथरवट, चर्मकार(पादत्राणे कारागीर), मेस्त्री, टोपल्या/चटया /झाडू/ कॉयर साहित्य कारागीर, बाहुल्या आणि खेळणी (पारंपरिक), न्हावी (केश कर्तनकार), फुलांचा हार कारागीर, परीट, धोबी, शिंपी, मासेमारचे जाळे निर्मिती, ईई विविध ग्रामीण व शहरी व्यावसायिकांना अर्थ सहाय्य देऊन समृद्ध करण्यात येणार आहे.
पंतप्रधान आवास योजना व जेनेरिक औषध केंद्रे उभारून ग्रामीण आरोग्यसेवा बळकट करण्यावर नरेंद्र मोदी यांनी यांनी भरीव घोषणा केल्यानंतर संबंधित मंत्र्यालयानी तातडीने अंमलबजावणीसाठी प्रशासकीय कार्यवाही सुरू केल्याचे सरकारी सूत्रांकडून समजते.
