Rahul Gandhi : युद्ध थांबवले पण पेपरफुटी थांबवता आली नाही… राहुल गांधींची पंतप्रधान मोदींवर टीका

21 June 2024

Rahul Gandhi : काँग्रेस नेते राहुल गांधी यांनी पेपर लीक प्रकरणावरून पंतप्रधान नरेंद्र मोदी सरकारवर कडाडून टीका केली आहे. राहुल गांधी म्हणाले की, पंतप्रधान नरेंद्र मोदी पेपर लीक होण्यापासून रोखण्यात अपयशी ठरले आहेत. दोषींवर कठोर कारवाई होणे आवश्यक आहे. मेहनती विद्यार्थ्यांसोबत हा मोठा धोका झाला आहे.

राहुल गांधी (Rahul Gandhi) यांनी म्हणाले की, NEET आणि UGC-NET पेपर लीक झाल्याच्या घटना अत्यंत गंभीर आहेत. काँग्रेसने संसदेत या मुद्द्याला वाचा फोडण्याची तयारी केली आहे. राहुल गांधी म्हणाले, “होय, निश्चितपणे आम्ही या मुद्द्याला संसदेत मांडू. NEET आणि UGC-NET च्या पेपर लीक झाल्या आहेत. म्हणत होते की नरेंद्र मोदी यांनी यूक्रेनची लढाई थांबवली, इजराइल आणि गाझाची लढाई थांबवली. पण भारतात पेपर लीक होण्यापासून रोखण्यास नरेंद्र मोदी अपयशी ठरले आहेत, किंवा त्यांना ते रोखायचे नाही.”

पेपर लीक झाल्यामुळे विद्यार्थ्यांचा विश्वास आणि मेहनतीवर घाला येत आहे. त्यामुळे दोषींवर कठोर कारवाई करून विद्यार्थ्यांना न्याय मिळवून देण्यासाठी सरकारने तात्काळ पावले उचलावी, अशी मागणी राहुल गांधी यांनी केली आहे.

Rahul Gandhi

पुढे ते म्हणाले की, बिहारबाबत आमचा मुद्दा असा आहे की, पेपर लीक करणाऱ्यांवर चौकशी झाली पाहिजे आणि कारवाई झाली पाहिजे. शैक्षणिक संस्था आरएसएस-भाजपच्या ताब्यात आहेत आणि हे बदलल्याशिवाय पेपरफुटी थांबणार नाही, असे राहुल गांधी म्हणाले.