धक्कादायक : सासरच्या लोकांनी घरातच केला गर्भपात, आई आणि बाळ दोघांचा मृत्यू

25 September 2024

Pune : पुण्यातून एक हृदयद्रावक आणि धक्कादायक घटना समोर आली आहे. सासरच्या लोकांनी एका 24 वर्षीय महिलेचा घरीच गर्भपात केल्याने महिला आणि तिच्या बाळाचा मृत्यू झाला. या हृदयद्रावक घटनेने संपूर्ण परिसरात भीतीचे वातावरण पसरले आहे. या प्रकरणात इंदापुर पोलिसांनी तत्काळ कारवाई करत महिलेला गर्भपात करायला लावणाऱ्या तिच्या पती आणि सासऱ्याला अटक केली आहे, तसेच सासूविरुद्धही गुन्हा दाखल केला आहे.

मिळालेल्या माहितीनुसार, मयत महिला चार महिन्यांची गर्भवती होती. त्या महिलेला आधी 1 मुलगा आणि 1 मुलगी होती.महिला पुन्हा तिसऱ्यांदा गरोदर राहिली. सासरच्या लोकांनी महिलेच्या गर्भाची तपासणी केली असता तिला मुलगी होणार असल्याचे समजले, असा संशय पोलिसांना आहे.

म्हणून महिलेच्या कुटुंबीयांनी तिचा गर्भपात करण्याचा निर्णय घेतला. या गर्भपातासाठी एका खासगी डॉक्टरला बोलावून तिचा घरातच गर्भपात करण्यात आला.आणि नंतर फार्महाऊसच्या शेतात गर्भ दफन करण्यात आला. गर्भपातानंतर महिलेला प्रचंड रक्तस्त्राव झाला, ज्यामुळे तिची प्रकृती गंभीर बनली. तिला तत्काळ रुग्णालयात नेण्याचा प्रयत्न करण्यात आला, परंतु रस्त्यातच तिचा मृत्यू झाला.

इंदापुर पोलीस ठाण्याच्या अधिकाऱ्याने दिलेल्या माहितीनुसार, रविवारी जास्त रक्तस्त्राव झाल्याने महिलेची प्रकृती बिघडू लागली. दुसऱ्या दिवशी तिला रुग्णालयात नेण्यात आले. मात्र रुग्णालयात पोहोचण्यापूर्वीच महिलेचा वाटेतच मृत्यू झाला.

महिलेच्या भावाने सासरच्या लोकांविरोधात पोलिसांत तक्रार दाखल केली आहे. या घटनेत पती आणि सासऱ्याला अटक करण्यात आली असून, सासूवर देखील गुन्हा दाखल करण्यात आला आहे.