Shinde Shivsena : शिंदेच्या शिवसेनेत पुन्हा भुकंप होणार ? अनेक आमदार ठाकरेंच्या संपर्कात

7 June 2024

Shinde Shivsena : लोकसभा निवडणुकीचा निकाल नुकताच पार पडला आहे. या निवडणूकीत महाविकास आघाडीने महायुतीच्या उमेदवारांचा दारूण पराभव केला आहे. यामध्ये एकनाथ शिंदे यांच्या शिवसेनेलाही मोठे नुकसान सहन करावे लागले आहे. या निकालानंतर आता एकनाथ शिंदे यांच्या शिवसेनेतील अनेक आमदार ठाकरे गटाच्या संपर्कात असल्याचा दावा ठाकरे गटाच्या नेत्यांनी केला आहे.

लोकसभेतील महायुतीच्या पराभवानंतर एकनाथ शिंदेंची शिवसेनेत अस्वस्थता पसरली आहे. येत्या विधानसभा निवडणुकीत काय होईल याची भीती त्यांच्याकडून व्यक्त केली जात आहे. अशात शिंदे गटातील आमदार पुन्हा एकदा घरवापसी करू शकतात, अशी शक्यता व्यक्त केली जात असताना शिंदे गटातील ६ आमदार ठाकरे गटाच्या संपर्कात असल्याचा दावा नेत्यांनी केला आहे. तसेच एकनाथ शिंदे यांचे ६ आमदार हे उद्धव ठाकरेंच्या (Uddhav Thackeray) उपस्थितीत पक्षप्रवेश करू शकतात, अशी शक्यता व्यक्त केली जात आहे. हे ६ आमदार नेमके कोण आहेत ते मात्र अद्याप समोर आलेलं नाही.

ठाकरे गटाचे आमदार सचिन अहिर यांनी दावा केला आहे की, अनेक लोक दिवाळीपासून आमच्याशी संपर्क करत आहेत. कारण ज्या लोकांना वाटलं की, आता आमचंच सरकार राहणार आहे, आता आम्हीच निवडून येणार आहोत. परंतु त्यांच्याशी किती संपर्क ठेवायचा? नाही ठेवायचा हा नंतरचा भाग आहे. आमच्यासाठी तो विषय संपला आहे. आम्ही आमच्याच लोकांना घेऊन विधानसभा लढणार आहोत, असं सचिन अहिर यांनी स्पष्ट केलं.

Shinde Shivsena

दरम्यान, मुख्यमंत्री एकनाथ शिंदे यांच्या शिवसेनेच्या काही आमदारांनी लोकसभेला ठाकरे गटाला मदत केल्याचे बोलले जात आहे. तसेच, विधानसभेला आमचा विचार करावा, अशी साद आता शिंदे गटाच्या आमदारांनी उद्धव ठाकरे यांना घातली आहे.