महाराष्ट्रातील प्रचाराला वेग! मोदी मुंबईत, तर राहुल गांधींची तोफ कोल्हापुरात धडाडणार

5 October 2024

Maharashtra Vidhansabha Elections : महाराष्ट्र विधानसभा निवडणुका जवळ आल्यामुळे आज, 5 ऑक्टोबर रोजी राज्यात प्रचाराचा धुराळा उडणार आहे. देशातील दोन बडे नेते, पंतप्रधान नरेंद्र मोदी आणि काँग्रेस खासदार राहुल गांधी, आज महाराष्ट्र दौऱ्यावर येत आहेत. निवडणुका तोंडावर असताना या दौऱ्यांना खूप महत्त्व दिले जात आहे.

पंतप्रधान नरेंद्र मोदी आज वाशिमसह ठाणे आणि नवी मुंबई येथे विविध कार्यक्रमांना उपस्थित राहणार आहेत. त्यांच्या हस्ते अनेक उपक्रमांचा शुभारंभ होणार आहे. आज सकाळी मोदी वाशिममध्ये येतील. 11.15 च्या सुमारास ते पोहरादेवी येथील जगदंबा माता मंदिरात दर्शन घेतील. वाशिम येथील संत सेवालाल महाराज आणि संत रामराव महाराज यांच्या समाधीवरही ते श्रद्धांजली अर्पण करतील. त्यानंतर, सकाळी 11:30 वाजता बंजारा विरासत संग्रहालयाचे त्यांच्या हस्ते उद्घाटन होईल.वाशिममध्ये 23,300 कोटी रुपयांच्या कृषी आणि पशुसंवर्धन क्षेत्राशी संबंधित विविध उपक्रमांचा शुभारंभ होईल. तसेच, बंजारा समाजाच्या समृद्ध वारशाचा गौरव करणाऱ्या बंजारा विरासत संग्रहालयाचे देखील उद्घाटन मोदींच्या हस्ते होणार आहे. याशिवाय, 9.4 कोटी शेतकऱ्यांना सुमारे 20,000 कोटी रुपयांचा पीएम किसान सन्मान निधीचा 18 वा हप्ता वितरित केला जाईल.

याशिवाय, पंतप्रधान नमो शेतकरी महासन्मान निधी योजनेच्या सुमारे 2,000 कोटी रुपयांच्या 5व्या हप्त्याचेही वितरण करतील.यानंतर ठाणे येथे 32,800 कोटी रुपयांच्या विविध विकास प्रकल्पांचे उद्घाटन आणि पायाभरणी मोदींच्या हस्ते होईल. सुमारे 12,200 कोटी रुपये खर्चून बांधण्यात येणाऱ्या ठाणे इंटिग्रल रिंग मेट्रो रेल्वे प्रकल्पाची पायाभरणी पंतप्रधानांच्या हस्ते होणार आहे.

दुसरीकडे, काँग्रेस खासदार राहुल गांधी आज कोल्हापूरच्या कसबा-बावडा येथे छत्रपती शिवाजी महाराज यांच्या पुतळ्याचं अनावरण करणार आहेत. या कार्यक्रमासाठी भव्य स्टेज उभारण्यात आले आहे. पुतळा अनावरणानंतर राहुल गांधी उपस्थित जनतेला संबोधित करतील.