Mumbai : आदिवासी आमदारांचे मंत्रालयात आंदोलन, मंत्रालयाच्या जाळीवर मारल्या उड्या

4 October 2024

Mumbai: विधानसभेचे उपाध्यक्ष नरहरी सीताराम झिरवळ आणि काही सत्ताधारी आमदारांनी मंत्रालयातील संरक्षक जाळीवर उड्या मारण्याची धाडसी घटना घडली आहे.उड्या मारण्यापूर्वी झिरवळ यांच्यासह काही आमदारांनी मुख्यमंत्री एकनाथ शिंदे यांची भेट घेतली होती. मात्र या भेटीतून काही सकारात्मक निर्णय न आल्याने या सत्ताधारी आमदारांनी जीव धोक्यात घालून मंत्रालयातील जाळीवर उड्या मारल्या.

आदिवासी समाजाच्या समस्यांसाठी झिरवळ यांनी मुख्यमंत्री शिंदे यांच्यासोबत दोन वेळा चर्चा केली होती. मात्र, या चर्चांमध्ये कोणतेही समाधानकारक उत्तर न मिळाल्याने झिरवळ यांनी “मुख्यमंत्री आमचे ऐकत नसतील तर आमच्याकडे प्लॅन बी आहे,” असे सांगितले.

तर दुसरीकडे आदिवासांच्या प्रश्नावर मुख्यमंत्री एकनाथ शिंदे यांना बुधवारी (02 ऑक्टोबर) सह्याद्री अतिथीगृह येथे भेटायला गेलेल्या राज्यातील आदिवासी आमदारांना भेटीसाठी तब्बल सात तास वाट बघावी लागली. सात तास बसून राहून मुख्यमंत्री शिंदे यांची भेट न होऊ शकल्याने आदिवासी आमदारांमध्ये त्यांच्याविषयी नाराजी होती.यानंतर आदिवासी आमदारांनी आज, शुक्रवारी (04 ऑक्टोबर) मुख्यमंत्र्यांशी चर्चा केली. मात्र त्यानंतर नरहरी झिळवाळ यांच्यासह काही आदिवासी आमदारांनी मंत्रालयातील जाळीवर उड्या मारल्या. मंत्रालयातील मंत्रिमंडळाची बैठक सुरू असतानाच बाहेर आदिवासी आमदारांचं आंदोलन सुरु आहे.

या घटनेनंतर झिरवळ यांची प्रकृती बिघडली असून त्यांचा रक्तदाब वाढला. त्यांच्या तपासणीसाठी डॉक्टरांची टीम मंत्रालयात दाखल झाली. पोलिसांनी तत्काळ हस्तक्षेप करत आमदारांना सुरक्षितपणे बाहेर काढले. परंतु, यानंतरही त्यांच्या आंदोलनात कमी होत नाही.

आदिवासी आमदारांची मुख्य मागणी एसटीच्या आरक्षणास धक्का लागू न देण्याबाबत आहे, तसेच पेसा कायद्यानुसार भरतीची मागणी त्यांनी केली आहे. झिरवळ यांनी स्पष्ट केले की, “आदिवासी आरक्षणाअंतर्गत धनगरांना आरक्षण देऊ नये,” या मागणीसोबतच नरहरी झिरवाळ यांनी आदिवासी आमदार आंदोलनातही सहभाग घेतला आहे. झिरवळ यांनी सांगितले की, “आमच्या समाजाने आम्हाला इथपर्यंत पोहोचवले, त्यांच्या हक्कांचे रक्षण करणे हे आपले कर्तव्य आहे.”