पुणे (प्रतिनिधी) : उन्हाळी सुटीचे निमित्त साधत अभिव्यक्ती, संघटीत महिला मंडळ, ताडीवाला रोड आणि जवाहर बाल मंच, पुणे शाखा यांच्यातर्फे वस्तीतील मुला-मुलींसाठी एक दिवसीय शिबीर आयोजित करण्यात आले होते. शनिवार, ६ मे रोजी सकाळी १० ते दुपारी ३ वाजेपर्यंत चाललेल्या या शिबीरात वस्तीतील जवळपास ५० मुला-मुलींनी भाग घेतला होता. विज्ञान प्रयोग, ओरिगामी हस्तकला, सामूहिक शरीरशिल्प बनवणे पासून ते गाणी, विज्ञान कोडी व मजेदार खेळ इथपर्यंत विवध उपक्रमात मुलांनी भाग घेतला. मुलांनी नवनवीन गोष्टी करून पहाव्या, त्यांच्यामध्ये विज्ञान व विविध गोष्टींविषयी कुतूहल वाढावे, त्यांच्यातल्या गुणांना वाव मिळावा, त्यांना आनंद मिळावा आणि त्या अनुषंगाने चर्चा आणि गप्पांद्वारे मूल्यशिक्षण घडावे. हा उद्देश डोळ्यासामोर ठेवून हे मोफत शिबिर आयोजित करण्यात आलं होतं.
तसेच यावेळी संघटीत महिला मंडळाच्या अध्यक्षा सुनिता शिंदे यांच्या घरी वस्तीतील मुलामुली आणि महिलांसाठी पुस्तक उपलब्ध झाली तर विविध विषयांची दालने त्यांच्यासाठी उघडतील हा हेतू डोळ्यासमोर ठेवून डॉ. बाबासाहेब आंबेडकर ग्रंथालायचे उद्घाटन ताडीवाला रोड परिसरातील कॉंग्रेसचे नेते मेहबूब नदाफ यांच्या हस्ते झाले. यावेळी वस्तीतील मुले, महिला, संघटीत महिला मंडळाच्या सुनिता शिंदे, कविता मेटकरी, स्नेहल मोहिते तर अभिव्यक्तीच्या श्रद्धा रेखा राजेंद्र, गीतांजली अंजली प्रकाश, अजित पेंटर आदी कार्यकर्ते उपस्थित होते. शिबिरासाठी विश्वदीप तरुण मंडळाचे विशेष साहाय्य लाभले.
