चंदीगड : पंजाब हरियाणा उच्च न्यायालयात प्रथमच आर्टिफिशियल इंटेलिजन्स अर्थात एआयचा वापर करण्यात आला आहे. एका खून प्रकरणातील जामीन अर्जावर निर्णय घेण्यासाठी उच्च न्यायालयाने चॅट जीपीटीचा वापर केला आहे. मंगळवारी पंजाब हरियाणा उच्च न्यायालयातील न्यायमूर्ती अनूप चितकारा यांच्या खंडपीठाने चॅट जीपीटीकडून मिळालेल्या उत्तराच्या आधारावर खुनाच्या आरोपीचा जामीन अर्ज फेटाळला.
हायकोर्टाने हा प्रश्न विचारला होता : आरोपींच्या जामीन अर्जावर आदेश देण्यापूर्वी हायकोर्टाने चॅट जीपीटीला विचारले होते की, हल्लेखोरांनी क्रूर हल्ला केला असताना जामीन मिळण्याचे न्यायशास्त्र काय आहे? प्रत्युत्तरात, चॅट जीपीटीने सांगितले की, ‘हल्लेखोरांनी कुठे क्रूरता केली हे प्रकरणाच्या विशिष्ट परिस्थिती, कायदे आणि नियमांवर अवलंबून आहे. जर हल्लेखोरांवर हिंसक गुन्ह्याचा आरोप आहे ज्यामध्ये क्रौर्य सामील आहे, तर मग ते समाजासाठी धोक्याचे मानले जाऊ शकते. अशा प्रकरणांमध्ये, आरोपीने सार्वजनिक सुरक्षेला धोका निर्माण होणार नाही याची खात्री करण्यासाठी न्यायाधीश जामीन देण्यास टाळू शकतात किंवा जामिनाची रक्कम खूप जास्त ठेवू शकतात’. त्यानंतर हायकोर्टाने आरोपीचा जामीन अर्ज फेटाळला.
‘एआयच्या वापराने अनेक मार्ग खुले होतील’ : कायदेतज्ज्ञ वरदान मल्होत्रा यांनी याबाबत सांगितले की, पंजाब हरियाणा उच्च न्यायालयात प्रथमच एखाद्या प्रकरणात आर्टिफिशियल इंटेलिजन्सचा वापर करण्यात आला आहे. कायद्याच्या बाबतीत आर्टिफिशियल इंटेलिजन्सचा वापर केल्यास अनेक मार्ग खुले होतील, असा त्यांना विश्वास आहे. मात्र याचे अनेक विपरीत परिणामही होऊ शकतात, असे ते म्हणाले. म्हणूनच त्याचे फायदे काय आणि तोटे काय असतील हे खूप बारकाईने पाहावे लागेल, असे त्यांनी नमूद केले आहे.
‘मानवी सर्जनशीलतेवरही परिणाम करू शकते’ : ते पुढे म्हणाले की, सर्वसाधारणपणे कृत्रिम बुद्धिमत्ता लोकांसाठी फायदेशीरच आहे. ज्या कामांमध्ये मानवाला कठोर परिश्रम करावे लागले त्यात कृत्रिम बुद्धिमत्ता खूप मदत करते आहे. ते म्हणाले की, मात्र कृत्रिम बुद्धिमत्ता मानवी सर्जनशीलतेवरही परिणाम करू शकते. आर्टिफिशियल इंटेलिजन्सबाबत आतापर्यंत जे काही पाहिले गेले आहे, यावरून हे स्पष्ट होते की ती अमर्याद आहे. चॅट जीपीटीने कायद्याची मोठी परीक्षा उत्तीर्ण केली आहे. जवळपास अशा सर्व परीक्षांमध्ये चॅट जीपीटी टॉप 20 मध्ये आली आहे. कायदेतज्ज्ञ वरदान म्हणाले की, कायद्यात कृत्रिम बुद्धिमत्तेचा वापर ही नवी क्रांती आहे. त्याच्या वापरामुळे येत्या काही दिवसांत न्यायालयात जे लाखो खटले प्रलंबित आहेत त्यांच्याशी डील करताना याचा फायदा होऊ शकतो. जर आपण त्याचा वापर योग्य तपासासाठी केला तर ते आपल्यासाठी एक उत्तम साधन ठरू शकते.
चॅट जीपीटी म्हणजे काय? : चॅट जीपीटी एक चॅटबॉट आहे, जो जनरेटिव्ह प्री – ट्रेंड ट्रान्सफॉर्मर आहे. तो आर्टिफिशियल इंटेलिजन्सवर काम करतो. चॅट जीपीटी डेटाच्या आधारे संशोधन करून कोणत्याही प्रश्नाचे उत्तर देतो. तो विद्यमान डेटावर आधारित नमुने जनरेट करतो. तसेच तो जुन्या गोष्टींना संदर्भ म्हणून लक्षात ठेवतो. उदाहरणार्थ, जर तुम्ही चॅट जीपीटीला या आधी काही विचारले असेल, तर तो भविष्यात या प्रकरणाचा संदर्भ देऊ शकतो.
Chat GPT In Court : न्यायालयाने पहिल्यांदाच चॅट जीपीटीच्या मदतीने दिला निकाल!, जाणून घ्या भविष्यात किती प्रभावी ठरेल
संबंधित लेख