धक्कादायक : बोपदेव घाटात तरुणीवर सामूहिक अत्याचार

5 October 2024

Pune: बोपदेव घाट परिसरात एका 21 वर्षीय तरुणीवर तिघा मित्रांनी सामूहिक अत्याचार केल्याची धक्कादायक घटना उघडकीस आली आहे. कोंढवा पोलिसांकडून या प्रकरणाचा तपास सुरू असून, आरोपींचा शोध घेण्यासाठी 25 पथकं वेगवेगळ्या ठिकाणी रवाना करण्यात आली आहेत. घटनेच्या तपासात एक महत्त्वाचा अपडेट समोर आला आहे.

गुरुवारी रात्री 11 वाजता ही गंभीर घटना घडली. पीडित तरुणी पुण्यातील एका इव्हेंट मॅनेजमेंट कॉलेजमध्ये शिकत होती आणि ती तिच्या मित्रासह बोपदेव घाटात गेली होती.याच ठिकाणी आरोपी देखील टु-व्हीलरवर आले होते. या रात्री तीन आरोपी मुलांनी तरुणीसोबत असलेल्या मुलाचा शर्ट काढला. त्याचे पाय बेल्टने बांधून ठेवले आणि गाडीची चवी व मोबाइल देखील काढून घेतला. त्यांच्यापैकी एकाकडे चाकू होता. त्यांनी चाकूचा धाक दाखवत मुलीवर सामूहिक अत्याचार केला. घटनेनंतर आरोपी तिथून पळून गेले. नंतर मुलीने बांधून ठेवलेल्या मित्राला सोडवले.

ही घटना ज्या ठिकाणी घडली तिथे मोबाइल रेंज नाही. तसेच दहा किमी अंतराच्या परिसरात सीसीटीव्ही देखील नसल्याने तपास करण्यास अडचणी निर्माण होत आहेत.अशात बोपदेव घाटात सासवडच्या बाजूला तीन संशयितांचं एक सीसीटीव्ही फुटेज पोलिसांच्या हाती लागलं आहे.

सीसीटीव्ही फूटेजमधून संशयित आरोपी तिघे जण दिसत असून पोलिसांनी त्यादृष्टीने तपास सुरू केला आहे. घटनेनंतर आरोपी काही मिनिटांनी पुढे जाऊन थांबले असावे, असा संशय पोलिसांना आहे. यानंतर पोलिसांनी सीसीटीव्ही फूटेज आणि तांत्रिक डाटाच्या मदतीने तपास सुरू केला आहे.

या सर्व घटनेमुळे पुण्यात एकच खळबळ उडाली आहे. महिला सुरक्षेचा गंभीर प्रश्न पुन्हा समोर आल्यामुळे पुण्यातील नागरिकांमध्ये भीतीचे वातावरण आहे.