One Nation One Election : ‘वन नेशन, वन इलेक्शन’ला केंद्रीय मंत्रिमंडळाची मंजुरी

13 December 2024

One Nation One Election : देशभरात गेल्या काही दिवसांपासून चर्चेत असलेल्या ‘वन नेशन, वन इलेक्शन’ म्हणजेच एक देश-एक निवडणुकीच्या धोरणाला आता पंतप्रधान नरेंद्र मोदी यांच्या नेतृत्वाखालील मंत्रिमंडळाची मान्यता मिळाली आहे.

आज झालेल्या मंत्रिमंडळाच्या बैठकीत या विधेयकाला मंजुरी देण्यात आली असून, लवकरच हे विधेयक संसदेच्या हिवाळी अधिवेशनात मांडले जाईल, अशी शक्यता वर्तवली जात आहे. संसदीय समिती स्थापन करून सर्व पक्षांची मते जाणून घेतल्यानंतरच हे विधेयक संसदेत सादर केले जाईल.

लोकसभा आणि राज्यसभेत एनडीएचे बहुमत असल्यामुळे एनडीएमधील सर्व पक्षांनी पाठिंबा दिल्यास हे विधेयक सहज संमत होऊ शकते. त्यानंतर राष्ट्रपतींच्या सहीने या विधेयकाचे कायद्यात रूपांतर होईल.

‘वन नेशन, वन इलेक्शन’ म्हणजे देशातील लोकसभा आणि विधानसभांच्या निवडणुका एकाच वेळी घेण्याचे धोरण. यामुळे निवडणूक प्रक्रियेसाठी लागणारा वेळ, खर्च आणि प्रशासनाची गुंतवणूक मोठ्या प्रमाणावर कमी होईल, असे सरकारचे म्हणणे आहे.

उच्चस्तरीय समितीच्या शिफारशींनंतर या धोरणाला अधिकृत मान्यता मिळाली आहे. आता संसदेच्या मंजुरीनंतर हे धोरण लागू होणार असल्याने देशातील निवडणूक प्रक्रियेत मोठा बदल होण्याची शक्यता आहे.