Sunetra Pawar : सुनेत्रा पवार यांना राज्यसभेसाठी उमेदवारी

14 June 2024

Sunetra Pawar : राज्यसभेसाठी राष्ट्रवादी काँग्रेसच्या प्रफुल पटेल यांची जागा रिक्त झाली आहे. रिक्त झालेल्या या जागेवर कुणाला संधी मिळणार याकडे सर्वांचे लक्ष लागले होते. या जागेसाठी अजित पवार यांचे पुत्र पार्थ पवार, पत्नी सुनेत्रा पवार तसेच राष्ट्रवादीचे नेते छगन भुजबळ यांची नावे चर्चेत होती. अखेर अजित पवार यांच्या पत्नी सुनेत्रा पवार यांना उमेदवारी देण्यात आली आहे.

सुनेत्रा पवार (Sunetra Pawar) यांना राज्यसभेची उमेदवारी देण्यात आली असून आज त्यांनी आपला उमेदवारी अर्ज दाखल केला. यावरून मात्र राष्ट्रवादी काँग्रेस पक्षात नाराजीनाट्य सुरु असल्याचे बोलले जात होते. मंत्री छगन भुजबळ (Chhagan Bhujbal) हे सुनेत्रा पवार यांच्या उमेदवारीवरून नाराज असल्याच्या चर्चा सुरु होत्या. आता नाराजीवर खुद्द छगन भुजबळ यांनी स्पष्टीकरण दिले आहे.

छगन भुजबळ म्हणाले की, अरे मी नाराज वगैरे नाहीये. आता पुढे बजेट सादर होणार आहे. काय काय करायचं थोडीशी चर्चा झाली पाहिजे. मी बिल्कुल नाराज नाहीये. माझ्या तोंडावर दिसतंय का मी नाराज आहे?, असा प्रतिसवाल छगन भुजबळ (Chhagan Bhujbal) यांनी केला आहे.

पुढे भुजबळ म्हणाले की, सुनेत्रा पवारांना राज्यसभेसाठी उभे करायचे आहे, असा निर्णय सर्वानुमते झालेला आहे. मी या निवडणुकीसाठी इच्छुक होतो, माझ्यासोबत आनंद परांजपे, बाबा सिद्धीची देखील इच्छुक होते. मात्र चर्चेअंती सर्वानुमते सुनेत्रा पवार यांना राज्यसभेसाठी उभे करण्याचा निर्णय घेतला.