ब्रेकिंग : पुणे अपघात प्रकरणात अग्रवाल कुटूंबातील जेष्ठ व्यक्तीला अटक

25 May 2024

Surendra agarwal : पुणे शहरातील कल्याणीनगरमध्ये बड्या बिल्डरच्या अल्पवयीन मुलाने भरधाव वेगाने पोर्श गाडी चालवत दोघांना उडवले होते. या अपघातानंतर पुणे पोलिसांच्या भूमिकेनंतर चौफेर टीका झाली. या अपघात (Pune Accident) प्रकरणात आता आणखी एक मोठी अपडेट समोर आली आहे. या प्रकरणात विशाल अग्रवालचे वडील सुरेंद्र अग्रवाल (Surendra agarwal) यांना पुणे पोलिसांच्या गुन्हे शाखेकडून अटक करण्यात आली.

पुणे अपघात प्रकरणाची पोलिसांनी अनेक पातळ्यांवर तपास सुरु केला आहे. या प्रकरणाचा तपास गुन्हे शाखेकडे देण्यात आला आहे. या प्रकरणात रोज नवीन अपडेट समोर येत आहे. आज पुन्हा या अपघात प्रकरणी पुणे पोलिसांनी आरोपी वेदांत अग्रवाल याचे आजोबा आणि विशाल अग्रवालचे वडील सुरेंद्र अग्रवाल यांना पुणे पोलिसांनी अटक केली आहे. या अपघात प्रकरणात विशाल अग्रवाल (Vishal Agrawal) पोलीस कोठडीत आहे, तर त्यांचा नातू आणि अल्पवयीन आरोपी वेदांत अग्रवाल बालसुधारगृहात आहे. त्यामुळे अग्रवालांच्या घरातील तिन्ही पिढ्या आता तुरुंगात आहेत. तसेच आता या प्रकरणात पोलिसांनी ही सातवी अटक केली आहे.

Surendra agarwal यांना का केली अटक?

अपघात झाल्यानंतर आपल्या अल्पवयीन नातवाला वाचवण्यासाठी ड्रायव्हर गंगाराम पुजारी याचा बळी देण्याचा सुरेंद्र कुमार यांचा डाव होता. आरोपी अग्रवाल कुटुंबाकडून अपघातादरम्यान गाडी ड्रायव्हर चालवत होता, असा दावा करण्यात आला होता. सुरेंद्र अग्रवाल यांनी दोन दिवस ड्रायव्हरला डांबून ठेवत ड्रायव्हरला धमकी दिल्याचा त्यांच्यावर आरोप आहे. याच गुन्ह्याच्या अंतर्गत पुणे पोलिसांनी सुरेंद्र अग्रवाल यांना अटक केली आहे. सुरेंद्र अग्रवाल याच्या विरोधात येरवडा पोलिसांनी अपहरणाचे कलम लावले आहे. कलम 365 आणि 368 कलम लावले आहे.

दरम्यान, सुरेंद्र अग्रवाल हे पुण्याच्या बांधकाम व्यवसायातील मोठं नाव आहे, मात्र सुरेंद्र अग्रवाल यांच्यावर आता इतरही काही गंभीर आरोप केले जात आहेत. त्यामध्ये त्यांचा छोटा राजनशी संबंध असल्याचा आरोप आहे, तसेच या प्रकरणी एक खटला सुद्धा त्यांच्यावर सुरु आहे.