E bike – महाराष्ट्रात 1 लाखाहून अधिक लोकसंख्या असलेल्या शहरांमध्ये ई-बाईक टॅक्सी सेवा मंजूर.

मुंबई (वर्षा चव्हाण) – महाराष्ट्र राज्य सरकारने नागरिकांना आधुनिक आणि पर्यावरणपूरक परिवहन सेवा पुरवण्यासाठी एक महत्वाचा निर्णय घेतला आहे. राज्यातील 1 लाखाहून अधिक लोकसंख्या असलेल्या शहरांमध्ये ई-बाईक टॅक्सी सेवा सुरू करण्यास मंजुरी देण्यात आली आहे. हे निर्णय परिवहन मंत्री प्रताप सरनाईक यांनी मुख्यमंत्री देवेंद्र फडणवीस यांच्या अध्यक्षतेखाली झालेल्या कॅबिनेट बैठकीत जाहीर केले. (E bike)

या नव्या सेवेमुळे शहरी भागातील प्रवाशांना 15 किलोमीटरपर्यंत आरामदायक आणि स्वस्त प्रवासाची सुविधा मिळणार आहे. याचा फायदा रस्त्यावरच्या वाहतूक कोंडी कमी करण्यासाठी होईल, तसेच पर्यावरणाला अनुकूल असलेली इलेक्ट्रिक बाईक वापरण्याचा पर्याय मिळेल.

योजनेनुसार, फक्त इलेक्ट्रिक बाईक टॅक्सींनाच परवानगी असणार आहे, ज्यामुळे “लास्ट माईल कनेक्टिव्हिटी” चांगली होईल. तसेच, 20 ते 50 वयाचेच ड्रायव्हर्स या सेवा पुरवू शकतील आणि महिलांसाठी महिला ड्रायव्हर्सची निवड करण्याचा पर्याय देखील उपलब्ध असेल. (E bike)

याव्यतिरिक्त, बाईक पुलिंगच्या पर्यायालाही मान्यता दिली आहे, जेणेकरून खासगी दुचाकी वाहनांना अधिक वापरता येईल. या सेवा सुरू करण्यासाठी मोटार वाहन कायद्यानुसार आवश्यक प्रमाणपत्र, परवाना व विमा देखील बंधनकारक राहील.

सरकारने यासाठी केवळ धोरण मंजूर केले असून, महसूल मॉडेल अंतिम रूपात आहे आणि ते लवकरच जाहीर केले जाईल. मंत्री प्रताप सरनाईक यांनी सांगितले की, सुरक्षा आणि स्वस्त दर हे या सेवेसाठी प्राथमिक लक्ष्य असतील.

या निर्णयामुळे महाराष्ट्रातील शहरी वाहतूक व्यवस्था सुधारण्यास मदत होईल आणि नागरिकांना सुलभ, पर्यावरणास अनुकूल प्रवासाचे पर्याय मिळतील.