लखनौ : उत्तर प्रदेशच्या कुशीनगर जिल्ह्यात ह्द्रयद्रावक घटना घडली आहे. लग्नाच्या निमित्तानं हळदीच्या कार्यक्रमाला आलेल्या महिला मंडपाजवळ असलेल्या विहिरीच्या स्लॅबवर उभ्या असताना विहिरीचा स्लॅब कोसळून विचित्र अपघात झाला.
नेबुआ नौरंगिया पोलीस ठाण्याच्या हद्दीतील नौरंगिया गावात बुधवारी रात्री उशिरा हळदीचा कार्यक्रम सुरू होता, हा समारंभ सुरू असताना काही महिला, मुली मंडपाजवळ असलेल्या विहिरीच्या स्लॅबवर उभ्या होत्या, जास्त महिला या स्लॅबवर उभ्या राहिल्याने हा स्लॅब खाली कोसळला त्यामुळे सर्व महिला विहिरीत पडल्या. या विचित्र अपघातात १३ जणांचा मृत्यू झाला. मृत्युमुखी पडलेल्यांमध्ये महिला आणि मुलींचा समावेश आहे. या घटनेची माहिती मिळताच परिसरात खळबळ उडाली.
या घटनेनंतर काही महिलांना बाहेर काढण्यात यश आले. मात्र, १३ जणांचा मृत्यू झाला तर काहींची प्रकृती गंभीर आहे. या दुर्घटनेने संपूर्ण गाव हादरला असून सगळीकडे शोककळा पसरली आहे.
दरम्यान, दुर्घटनेत मृत्युमुखी पडलेल्यांच्या नातेवाईकांना प्रत्येकी चार लाख रुपये देण्यात येणार असल्याचे जिल्हा प्रशासनानं सांगितले आहे.