अंगणवाडीत विविध पदांसाठी भरती ; मंत्री आदिती तटकरे यांनी दिली महत्वाची माहिती

7 February 2025

0

मुंबई : महिला आणि बालविकास विभागांतर्गत अंगणवाडीत (Anganwadi Bharti 2025) विविध पदांसाठी भरती प्रक्रिया सुरू झाली आहे. यामध्ये मदतनीस, पर्यवेक्षिका आणि मुख्य सेविका या पदांचा समावेश असून, येत्या 100 दिवसांत ही भरती प्रक्रिया पूर्ण करण्याचे आदेश मुख्यमंत्री देवेंद्र फडणवीस यांनी दिले आहेत.

एकात्मिक बाल विकास सेवा योजनेअंतर्गत भरती

महिला व बालविकास विभागाच्या एकात्मिक बाल विकास सेवा योजनेंतर्गत अंगणवाड्यांसाठी पर्यवेक्षकीय अधिकारी, संरक्षण अधिकारी, अधीक्षक या पदांचीही भरती होणार आहे. ऑगस्ट 2022 मध्ये मदतनीस म्हणून निवड झालेल्या महिलांनी जर 10वी उत्तीर्ण केली असेल, तर त्यांची थेट सेविकापदी नियुक्ती केली जाणार आहे.

पारदर्शक भरतीसाठी शासन यंत्रणा सज्ज (Anganwadi Bharti 2025)

भरती प्रक्रिया पूर्णतः पारदर्शक पद्धतीने होणार असून, परीक्षा केंद्रांवर जॅमर बसविण्यात येणार असल्याची महत्वाची माहिती महिला व बालविकास मंत्री आदिती तटकरे यांनी दिली आहे. तसेच उमेदवारांना कोणत्याही आमिषाला बळी न पडण्याचे आवाहन केले आहे.

राज्य शासनाच्या 100 दिवसांच्या उद्दिष्टपूर्ती कार्यक्रमांतर्गत ही भरती होत असून, सरळसेवा आणि पदोन्नती अंतर्गत रिक्त पदे भरण्याची प्रक्रिया वेगाने सुरू आहे. इच्छुक महिलांसाठी ही उत्तम संधी आहे, त्यामुळे लवकरात लवकर अर्ज करण्याचे आवाहन करण्यात आले आहे.