Maharashtra Bandh : उद्या महाराष्ट्र बंद ; ‘या’ सेवा राहणार बंद

23 August 2024

Maharashtra Bandh : बदलापूर येथील ४ आणि ६ वर्षांच्या दोन चिमुकल्यांवर शाळेतील सफाई कर्मचाऱ्याने अत्याचार केल्याच्या घटनेने महाराष्ट्र हादरला आहे. या घटनेच्या निषेधार्थ आणि राज्यातील महिलांवरील अत्याचाराच्या घटनांविरोधात महाविकास आघाडीकडून २४ ऑगस्ट रोजी महाराष्ट्र बंदची हाक देण्यात आली आहे. संतप्त नागरिकांकडून आरोपीला फाशीची शिक्षा देण्याची मागणी केली जात आहे.

महाविकास आघाडीने केलेल्या आवाहनानुसार, राज्यातील सर्व शाळा, कॉलेज, मुलांचे पालक, दुकानदार, यांनी या बंदमध्ये सहभागी व्हावे. या बंदच्या माध्यमातून महिलांची सुरक्षितता सुनिश्चित करण्याची मागणी जोर धरत आहे. उद्धव ठाकरे यांनी देखील नागरिकांना या बंदमध्ये सहभागी होण्याचे आवाहन केले आहे. बंद दरम्यान अत्यावश्यक सेवा वगळता सर्व बाजारपेठा बंद राहणार आहेत. दूध, भाजीपाला मार्केट, किराणा दुकाने, तसेच हॉटेल्स सुद्धा बंद असण्याची शक्यता आहे.

उद्या, २४ ऑगस्ट रोजी दुपारी दोन वाजेपर्यंत बंद पाळण्याचे आवाहन करण्यात आले आहे. महाविकास आघाडीतर्फे आयोजित या बंदमध्ये एसटी बस, लोकल, आणि अन्य सार्वजनिक वाहतूक सेवा ठप्प होण्याची शक्यता आहे. बदलापूर घटनेच्या निषेधार्थ आंदोलकांनी काही दिवसांपूर्वी रेल्वे रोको आंदोलन केले होते, त्यामुळे मुंबई लोकल सेवेवर याचा परिणाम होऊ शकतो.

Maharashtra Bandh

उद्धव ठाकरे यांनी या बंदसाठी नागरिकांना संयम राखण्याचे आवाहन केले असून, हिंसाचार टाळण्याची विनंती केली आहे. सरकार अकार्यक्षम असलं तरी जनतेला सक्षम व्हावे लागते, असा इशारा त्यांनी सत्ताधाऱ्यांना दिला आहे.

बदलापूर प्रकरणातील आंदोलकांवर दाखल केलेले गुन्हे मागे घेण्याची मागणी ठाकरे यांनी केली आहे. “आम्ही लाडकी बहीण योजनेच्या विरोधात नाही, पण सुरक्षित बहीण महत्त्वाची आहे,” असे ठाकरे यांनी नमूद केले.

या महाराष्ट्र बंदमध्ये मोठ्या संख्येने नागरिक सहभागी होण्याची शक्यता आहे, ज्यामुळे महाराष्ट्रातील दळणवळण आणि जनजीवनावर मोठा परिणाम होऊ शकतो. महाविकास आघाडीकडून आयोजित या बंदला नागरिकांचा उत्स्फूर्त प्रतिसाद मिळण्याची शक्यता आहे.