मदुराई : कम्युनिस्ट पार्टी ऑफ इंडिया (मार्क्सिस्ट) अर्थात माकपच्या २४ व्या पक्ष अधिवेशनात आज एक महत्त्वाचा निर्णय घेण्यात आला. केरळचे ज्येष्ठ नेते आणि पोलिट ब्युरो सदस्य एम ए बेबी (M A Baby) यांची पक्षाच्या सरचिटणीसपदी (जनरल सेक्रेटरी) निवड झाली आहे. तामिळनाडूतील मदुराई येथे सुरू असलेल्या या अधिवेशनाचा आज समारोप झाला असून, बेबी यांच्या निवडीने पक्षात नव्या नेतृत्वाला सुरुवात झाली आहे. ते पक्षाचे सहावे सरचिटणीस असून, केरळमधून या पदावर निवड झालेले ते दुसरे नेते ठरले आहेत. यापूर्वी दिग्गज मार्क्सवादी नेते ई. एम. एस. नंबूदरीपाद यांनी हे पद भूषवले होते.
निवड प्रक्रिया आणि पक्षांतर्गत चर्चा
माकपच्या केंद्रीय समितीच्या पहिल्या बैठकीत एम ए बेबी यांच्या नावाला मंजुरी देण्यात आली. पक्षाचे माजी सरचिटणीस प्रकाश करात यांनी बेबी यांचे नाव प्रस्तावित केले होते, तर पश्चिम बंगालचे नेते मोहम्मद सलीम यांनी त्याला पाठिंबा दिला. (हेही वाचा –माजी आमदार शहाजी बापू पाटील यांची भर सभेत थोबाडीत, वाचा सभेत काय घडले)
कोण आहेत एम ए बेबी? | M A Baby
मरियम अलेक्झांडर बेबी ऊर्फ एम ए बेबी (Mariam Alexander Baby) यांचा जन्म ५ एप्रिल १९५४ रोजी केरळमधील कोल्लम जिल्ह्यातील प्रक्कुलम येथे झाला. त्यांचे वय ७१ असून, ते माकपमधील सर्वात ज्येष्ठ नेत्यांपैकी एक आहेत. त्यांनी आपल्या राजकीय कारकिर्दीची सुरुवात शालेय जीवनातच केरळ स्टुडंट्स फेडरेशन (केएसएफ) मधून केली, जी नंतर स्टुडंट्स फेडरेशन ऑफ इंडिया (एसएफआय) म्हणून ओळखली गेली. आणिबाणीच्या काळात ते विद्यार्थी चळवळीतील प्रमुख नेते होते आणि त्यांना तुरुंगवासही भोगावा लागला होता. (हेही वाचा – माजी मंत्री धनंजय मुंडे यांना माझगाव न्यायालयाचा दणका)
बेबी यांनी डेमोक्रॅटिक यूथ फेडरेशन ऑफ इंडिया (डीवायएफआय) चे राष्ट्रीय अध्यक्ष म्हणूनही काम केले. १९८६ मध्ये वयाच्या अवघ्या ३२ व्या वर्षी ते राज्यसभेचे खासदार बनले आणि १९९८ पर्यंत या पदावर राहिले. २०१२ मध्ये त्यांची पोलिट ब्युरोमध्ये निवड झाली. केरळमध्ये शिक्षणमंत्री म्हणून त्यांनी महत्त्वपूर्ण सुधारणा केल्या आणि कोची बिएनाले सारख्या सांस्कृतिक उपक्रमांना चालना दिली. (हेही वाचा – महानगरपालिकेच्या आयुक्तांनी स्वतःवर गोळी झाडून घेतली, वाचा काय आहे प्रकरण !)
पक्षातील बदल आणि नवे पोलिट ब्युरो
या अधिवेशनात माकपच्या केंद्रीय समितीत ८५ सदस्यांची निवड झाली, ज्यात एक जागा रिक्त आहे. नव्या १८ सदस्यीय पोलिट ब्युरोमध्ये बेबी यांच्यासह सात नवे चेहरे समाविष्ट झाले आहेत. यामध्ये विजू कृष्णन, जितेंद्र चौधरी, अमरा राम, मारियम धवळे, अरुण कुमार, श्रीदीप भट्टाचार्य आणि यू. वासुकी यांचा समावेश आहे. विशेष म्हणजे, पक्षाने ७५ वर्षांच्या वयोमर्यादेचा नियम शिथिल करत केरळचे मुख्यमंत्री पिनराई विजयन यांना पोलिट ब्युरोमध्ये कायम ठेवले आहे. (हेही वाचा – धक्कादायक : पुण्यात शरीराचे पाच तुकडे करून खाणीत फेकला मृतदेह)
माकपच्या केंद्रीय समितीत महाराष्ट्रातील मारियम धवळे, अशोक ढवळे, महाराष्ट्र राज्य सचिव अजित नवले, आमदार विनोद निकोले यांना संधी देण्यात आली आहे.
बेबी यांच्यासमोरील आव्हाने
एम ए बेबी यांची निवड अशा वेळी झाली आहे, जेव्हा माकपचे पारंपरिक गड असलेल्या केरळ आणि पश्चिम बंगालमध्ये २०२६ मध्ये निवडणुका होणार आहेत. गेल्या वर्षी सप्टेंबरमध्ये पक्षाचे माजी सरचिटणीस सिताराम येचुरी यांचे निधन झाल्याने ही जागा रिक्त झाली होती. त्यानंतर प्रकाश करात यांनी अंतरिम समन्वयकाची भूमिका पार पाडली होती. (हेही वाचा – नाशिकमध्ये पत्नी पीडित पुरुषांचा मेळावा, पुरुष आयोगाची केली मागणी)
बेबी यांच्यासमोरील प्रमुख आव्हानांमध्ये पक्षाला जनतेपर्यंत पोहोचवणे, अंतर्गत गटबाजी कमी करणे आणि आधुनिक काळानुसार पक्षाला प्रगतिशील स्वरूप देणे यांचा समावेश आहे.