मोठी बातमी : दिल्लीचे मुख्यमंत्री अरविंद केजरीवाल यांना जामीन

21 June 2024

Delhi CM Arvind Kejriwal : दिल्लीचे मुख्यमंत्री अरविंद केजरीवाल (Arvind Kejriwal) यांना न्यायालयाकडून जामीन मिळाला आहे. अरविंद केजरीवाल यांना दारू घोटाळ्याप्रकरणी अटक करण्यात आली होती. राऊस ॲव्हेन्यू कोर्टाने केजरीवाल यांना एक लाख रुपयांच्या जातमुचलक्यावर जामीन मंजूर केला आहे. (Delhi)

दारू घोटाळ्याच्या आरोपात मनी लॉन्ड्रिंग प्रकरणात दिल्लीचे मुख्यमंत्री अरविंद केजरीवाल (Arvind Kejriwal) यांना जामीन मिळाला आहे. अरविंद केजरीवाल यांना ईडीने 21 मार्चला अटक केली होती. यानंतर त्याची रवानगी 1 एप्रिल रोजी तिहार तुरुंगात करण्यात आली. यापूर्वी सर्वोच्च न्यायालयाने निवडणुकीच्या वेळी केजरीवाल यांना 21 दिवसांचा अंतरिम जामीन दिला होता. 21 दिवस जामिनावर बाहेर राहिल्यानंतर केजरीवाल यांनी 2 जून रोजी सायंकाळी 5 वाजता तिहार तुरुंगात आत्मसमर्पण केले. आता मात्र अरविंद केजरीवाल यांना मोठा दिलासा मिळाला आहे.

दरम्यान, ईडीने कोर्टाकडे 48 तासांचा वेळ मागितला होता, ईडीतर्फे अतिरिक्त सॉलिसिटर जनरल एसव्ही राजू यांनी न्यायालयाला सांगितले की, ईडीकडे केजरीवाल यांच्याविरोधात सबळ पुरावे आहेत. त्यामुळे त्यांना जामीन मिळू नये. मात्र कोर्टाने ईडीचे दावे फेटाळून लावत केजरीवालांना जामीन दिला आहे. दिल्लीच्या राऊज एवेन्यू कोर्टाने केजरीवालांना जामीन मंजूर केला आहे. जामिनाची प्रक्रिया पूर्ण झाल्यानंतर अरविंद केजरीवाल शुक्रवारी तुरुंगातून बाहेर येऊ शकतात.