Jalgaon : पाणीपुरी खाल्ल्याने 80 जणांना विषबाधा, परिसरात खळबळ

19 June 2024

Jalgaon : जळगाव जिल्ह्यातील चोपडा तालुक्यातील एका गावात पाणीपुरी खाल्ल्याने तब्बल 80 जणांना विषबाधा (Panipuri Poisson) झाल्याची धक्कादायक घडना घडली आहे. या घटनेमुळे परिसरात एकच खळबळ उडाली आहे. यात लहान मुले आणि महिलांचा समावेश आहे. सुदैवाने या विषबाधा घटनेत कोणतीही जीवितहानी झाली नाही. सर्व रुग्णांवर उपचार सुरू आहेत आणि त्यांची प्रकृती स्थिर आहे. (Jalgaon)

मिळालेल्या माहितीनुसार, चोपडा तालुक्यातील कमळगाव येथे सोमवारी आठवडी बाजार होता. त्यामुळे कमळगाव येथे चांदसणी, मितावली, पिंप्री तसेच आजूबाजूच्या खेड्यांतील ग्रामस्थ बाजारासाठी आले होते. त्यावेळी अनेकांनी या आठवडे बाजारातील पाणीपुरी खाल्ली. तर काहींनी घरी खायला पार्सल नेले. मात्र त्यानंतर काही वेळातच अनेक लोकांना त्रास होऊ लागला. या पाणीपुरीतून मंगळवारी तब्बल 80 जणांना विषबाधा झाल्याची धक्कादायक घटना घडली.

Jalgaon पाणीपुरी विषबाधा

विषबाधा झालेल्या नागरिकांमध्ये काही लहान मुलांचाही समावेश आहे. पाणीपुरी खाल्ल्यानंतर त्यांना उलट्या, जुलाब, पोटदुखी असा त्रास झाला. या विषबाधीत (Panipuri Poisson) रुग्णांना उपचारासाठी रुग्णालयात दाखल करण्यात आलं आहे. सर्वांची प्रकृती स्थिर असल्याची माहिती मिळत आहे.

पाणीपुरीमुळे त्रास झाल्याबाबत सोमनाथ जगन कोळी (रा. पिंप्री) यांनी पोलिस स्टेशनला लेखी जबाब दिला आहे. अडावद येथे सायंकाळनंतर अडावद प्राथमिक आरोग्य केंद्रात पिंप्री, कमळगाव येथील विषबाधा झालेले सर्वच वयोगटातील रुग्ण वाढतच गेले. या ठिकाणाहून ७० पैकी ३० रुग्ण चोपडा येथे उपजिल्हा रुग्णालयात व इतर रुग्ण खासगी व जळगाव जिल्हा रुग्णालयात पाठविण्यात आले.