मोठी बातमी : महिलांसाठी सुवर्ण संधी ; महिला व बालविकास विभागात 18,882 पदांची भरती

13 February 2025

0

Women and Child Department bharti : महिला व बालविकास विभागांतर्गत एकात्मिक बालविकास सेवा योजनेअंतर्गत 5639 अंगणवाडी सेविका आणि 13,243 अंगणवाडी मदतनीस अशा एकूण 18,882 पदांची भरती करण्यात येणार आहे. आज मंत्रालयात मंत्री आदिती तटकरे यांच्या अध्यक्षतेखाली बैठक पार पडली. (Anganwadi bharti)

तब्बल 18,882 पदांची भरती (Anganwadi bharti)

14 फेब्रुवारी ते 2 मार्च दरम्यान मुख्य सेविका पदासाठी सरळ सेवा व निवडीद्वारे 374 पदांची भरती केली जाणार आहे. एकूण 18,882 पदांची भरती करण्यात येणार आहे. संपूर्ण प्रक्रिया पारदर्शक राहावी, यासाठी आवश्यक त्या उपाययोजना करण्याचे निर्देश मंत्री तटकरे यांनी अधिकाऱ्यांना दिले. तसेच उमेदवारांनी कोणत्याही आमिषाला बळी पडू नये, असे आवाहनही त्यांनी केले.

राज्यात एकूण 553 बाल विकास प्रकल्प कार्यालयांतर्गत 1,10,591 अंगणवाडी केंद्रे कार्यरत आहेत. या भरतीसह राज्य महिला आयोग, महिला आर्थिक विकास महामंडळ, बालकल्याण समिती आणि बाल न्याय मंडळातील रिक्त पदे भरली जाणार असल्याचेही त्यांनी स्पष्ट केले.

महिला बचत गटांना प्रोत्साहन

महिला बचत गटांनी पोषण आहारासाठी आदर्श कम्युनिटी किचन सुरू करावेत, यासाठी निधी उपलब्ध करून दिला जाईल, असेही मंत्री तटकरे यांनी सांगितले. अंगणवाडी आहार पुरवठ्यासाठी एका संस्थेला पाच अंगणवाड्या दिल्या जातील. तसेच भिवंडी निजामपूर महानगरपालिका क्षेत्रात लोकसंख्येच्या वाढीमुळे 102 नवीन अंगणवाड्यांची मागणी सकारात्मक दृष्टीकोनातून विचाराधीन आहे.

सुविधा वाढवण्यावर भर

नगरपालिकांमध्ये महिला व बालविकास विभागाचा अधिकारी नियुक्त करणे, अंगणवाड्या शाळेतील रिकाम्या वर्गखोल्यांमध्ये सुरू करणे, तसेच पिण्याचे पाणी आणि स्वच्छतागृह उपलब्ध करून देण्याच्या सूचनाही मंत्री तटकरे यांनी दिल्या.

राज्यातील महिला व बालकांच्या कल्याणासाठी विविध योजनांची प्रभावी अंमलबजावणी करण्यास सरकार कटिबद्ध असून, भरती प्रक्रियेसह इतर आवश्यक सुविधा पुरवण्यावर भर दिला जाईल, असेही मंत्री तटकरे यांनी यावेळी सांगितले.