Walmik Karad : मस्साजोग गावचे सरपंच संतोष देशमुख (Santosh Deshmukh) हत्या प्रकरणातील मुख्य आरोपी वाल्मिक कराड आणि सुदर्शन घुले यांना बीड जिल्हा कारागृहात मारहाण झाल्याची माहिती समोर आली आहे. ही घटना बीडच्या कारागृहात कैद्यांच्या दोन गटांमध्ये झालेल्या वादातून उद्भवली असून, या मारहाणीमुळे पुन्हा एकदा या हत्याकांडाची राज्यभरात चर्चा सुरू झाली आहे.
Walmik Karad ला मारहाण
वाल्मिक कराड आणि सुदर्शन घुले हे दोघेही संतोष देशमुख हत्या प्रकरणात मकोका (महाराष्ट्र नियंत्रण कायदा) अंतर्गत शिक्षा भोगत आहेत. बीडच्या कारागृहात त्याच बॅरेकमध्ये इतर आरोपींसह ठेवण्यात आले होते. या प्रकरणात परळी येथील महादेव गिते आणि अक्षय आठवले हे देखील आरोपी असून, त्यांचा गट आणि कराड-घुले यांच्यात मागील काही दिवसांपासून तणावाचे वातावरण होते. (हेही वाचा – मोठी बातमी : व्लादिमीर पुतिन यांच्या आलिशान कारमध्ये मोठा स्फोट)
या मारहाणीमागील मुख्य कारण म्हणजे वाल्मिक कराडने महादेव गितेला एका खोट्या गुन्ह्यात अडकवल्याचा राग होता. हा राग मनात धरून गिते आणि त्याच्या साथीदारांनी कराड आणि घुले यांच्यावर हल्ला केला. (हेही वाचा – शेतकऱ्यांच्या कर्जमाफी संदर्भात अजित पवारांचे मोठे विधान)
सुरुवातीला दोन्ही गटांमध्ये बाचाबाची झाली, नंतर ती शारीरिक हिंसेत बदलली. मिळालेल्या माहितीनुसार, महादेव गिते आणि अक्षय आठवले यांनी सुदर्शन घुलेला लाथा-बुक्क्यांनी मारहाण केली, तर वाल्मिक कराडला कानशिलात आणि चापटी मारल्या गेल्या. या घटनेत कोणीही गंभीर जखमी झाले नसले तरी कारागृहातील वातावरण तणावपूर्ण बनले. ३१ मार्च रोजी सकाळी ९ वाजण्याच्या सुमारास बीड कारागृहात ही घटना घडली. अखेर पोलिसांनी तातडीने हस्तक्षेप करून परिस्थिती नियंत्रणात आणली. (हेही वाचा – मोठी बातमी : 1 एप्रिलपासून वीज दर कमी होणार, सामान्यांना मिळणार दिलासा)
संतोष देशमुख हत्या प्रकरणाचा संदर्भ
संतोष देशमुख, मस्साजोग गावचे सरपंच, यांची ९ डिसेंबर २०२४ रोजी अत्यंत क्रूरपणे हत्या करण्यात आली होती. या हत्येत वाल्मिक कराड हा मास्टरमाइंड असल्याचा आरोप आहे, तर सुदर्शन घुले याने प्रत्यक्ष हत्येत सहभाग घेतला होता. या प्रकरणात दोन कोटींच्या खंडणीचा आरोपही आहे, जो अवादा एनर्जी कंपनीकडून मागण्यात आला होता. सुदर्शन घुलेने पोलिसांना दिलेल्या जबाबात कराडच्या सूचनेवरून ही हत्या केल्याचे कबूल केले होते. या घटनेनंतर बीडमध्ये तणावाचे वातावरण निर्माण झाले असून, कारागृहातील मारहाणीने या प्रकरणाला नवे वळण मिळाले आहे. (हेही वाचा – दहावी आणि बारावीच्या निकालाच्या तारखे संदर्भात महत्वाची माहिती समोर)