पुणे : मुदत संपत आलेल्या दुधाचे वितरण करून विद्यार्थ्यांच्या भविष्याशी खेळणाऱ्या प्रकल्प अधिकारी व ठेकेदार यांच्या विरोधात स्टुडंट्स फेडरेशन ऑफ इंडिया आणि डेमोक्रॅटिक युथ फेडरेशन ऑफ इंडियाच्या वतीने उद्या जिल्ह्यात आंदोलन करण्यात येणार.
प्रथम टप्प्यात हे आंदोलन गावागावात, फेसबुक, व्हाट्सएपच्या माध्यमातून करण्यात येणार असून दुसऱ्या टप्प्यात मुख्यमंत्री, आदिवासी विकास मंत्री, आयुक्त यांना मेल पाठविण्यात येणार असल्याची माहिती SFI चे जिल्हा अध्यक्ष अविनाश गवारी यांनी महाराष्ट्र जनभूमीशी बोलताना सांगितले.
आदिवासी भागातील आश्रमशाळांतील मुलांना पुरवण्यात येणारे सुगंधी दूध २ ते ३ दिवसच बाकी असताना आदिवासी मुलांना दिले. विशेष म्हणजे या दुधाला दुर्गंधी पसरलेली आहे. तसेच हे दुध पिऊन अनेक मुलामुलींना उलट्या, पोटदुखी, ताप इ. आजारांना सामोरे जावे लागत असल्याचे SFI ने म्हटले आहे.
SFI – DYFI म्हटले आहे की, “आदिवासी मुलांच्या आहाराची शासनाला एवढीच चिंता होती, तर त्यास इतर पोषण आहार का देण्यात आला नाही? फक्त दूधच का दिले गेले ? वरील घटनेवरून असे दिसून येत आहे की, संबंधित दूध वाटण्याची प्रक्रिया हे प्रशासन कुणाचे तरी हितसंबंध साधण्यासाठी करत आहे, असे स्पष्ट होते.”
कारण कोविड-१९ च्या लॉकडाऊन काळात प्रशासनाकडून आदिवासी मुलांना कोणतीच मदत झाली नाही. नुकतेच शैक्षणिक वर्ष सुरू झाले आहे, त्यामुळं अनेक आदिवासी मुलांच्या शिक्षणाचा प्रश्न मोठ्या प्रमाणात निर्माण झाला आहे. बहुतांश आदिवासी विद्यार्थी हे ग्रामीण भागात राहत आहेत, त्यांच्याकडे ऑनलाइन शिक्षणासाठी मोबाईल ची सुविधा नाही, रेंज नाही. यावर लक्ष न देता एकात्मिक आदिवासी विकास प्रकल्प कार्यालय घोडेगाव, कुणाचे तरी हितसंबंध राखण्यासाठी आदिवासी मुलांच्या जीवाशी खेळण्याचे कारस्थान अधिकारी, ठेकेदार व प्रशासन हे कोविड-१९ च्या महामारीच्या काळात करत आहेत. परिणामी या घटनेमुळे आदिवासी मुलांच्या जीविताचा धोका झाला असता तर याला जबाबदार कोण ? असा सवाल उपस्थित केला आहे.
‘या’ आहेत आंदोलनाच्या मागण्या –
● एकात्मिक आदिवासी विकास प्रकल्प कार्यालय घोडेगाव अंतर्गत २३ आश्रमशाळांतील सुमारे ५ हजार मुलांना मुदत संपत आलेले सुगंधी दूध वाटणाऱ्या अधिकारी, ठेकेदार यांच्यावर अन्न सुरक्षा कायद्याअंतर्गत गुन्हा दाखल करून खातेनिहाय चौकशी करण्यात यावी.
● आदिवासी विकास विभागाने कोविड – १९ च्या काळात आदिवासी मुलांच्या शिक्षणासाठी कोणतीच ठोस उपाययोजना केलेली नाही, त्यामुळे अनेक आदिवासी विध्यार्थी शिक्षणापासून वंचित राहणार आहेत. त्यावर आदिवासी विकास विभागाने योग्य ती भूमिका घेऊन त्यांचे शैक्षणिक नुकसान होणार नाही याची हमी द्यावी.
● लॉकडाऊन काळात आश्रमशाळांतील मुलांना दूधा सारखे नाशवंत पदार्थ न देता, टिकाऊ योग्य तो पोषण आहार देण्यात यावे.
उद्या होणाऱ्या निषेध आंदोलनात जास्तीत जास्त विद्यार्थी, युवक, पालकांनी सहभागी होण्याचे आवाहन SFI-DYFI च्या वतीने करण्यात आले.