मागण्या मान्य होईपर्यत संप चालूच राहणार
पुणे, दि. २२ : आशा व गटप्रवर्तकांनी काल रस्त्यावर येत किमान वेतन देण्याबरोबरच इतर मागण्या केल्या. यावेळी हजारो आशा व गटप्रवर्तकांनी या आंदोलनात सहभाग घेतला. राज्यभरात या आंदोलनाला प्रतिसाद मिळाला असून आंदोलन अजून तीव्र करण्याची शक्यता वर्तवली जात आहे.
काल झालेल्या आंदोलनात जिल्हाधिकारी कार्यालय, जिल्हा परिषद, पालकमंत्री यांचे कार्यालय अशा विविध ठिकाणी हे आंदोलन करण्यात आले. हजारोंच्या संख्येने आशा व गटप्रवर्तक या आंदोलनात रस्त्यावर आल्या. तर काही ठिकाणी तालुका स्तरावर निवेदन, धरणेही करण्यात आल्याची माहिती सूत्रांकडून मिळते.
■ आशा व गटप्रवर्तकांच्या मागण्या पुढीलप्रमाणे :
● सार्वजनिक आरोग्य व्यवस्था मजबूत करा.
● आशा व गटप्रवर्तकाना आरोग्य कर्मचारी म्हणून केले पाहिजे.
● आशाना १८,००० रू. व गटप्रवर्तकाना २२,००० रू. वेतन मिळाले पाहिजे.
● आशा व गटप्रवर्तकाना प्रतिदिन ३०० रू. कोविड भत्ता मिळाला पाहिजे.
● आशा व गटप्रवर्तकाना माझे कुटुंब माझी जबाबदारी मोहिमेचा सर्व टप्प्याचा मोबदला मिळाला पाहिजे.
● कोरोना बाधित आशा व गटप्रवर्तक व त्यांच्या कुटुंबियांना व्हेंटिलेटरसह बेड राखीव ठेवण्यात यावेत.
● अँटीजेनचे टेस्टचे काम आशांवर लादू नये.
● आरोग्य कर्मचाऱ्याचा कोरोनामुळे मृत्यू झाल्यास 50 लाखाचा विमा कवच आहे, त्यामध्ये आशा व गटप्रवर्तक यांचा स्पष्ट उल्लेख करावा.
● आरोग्यवर्धिनी समूह मध्ये गटप्रवर्तकना १५०० रू. दरमहा मोबदला द्यावा.
● प्रेरणा प्रकल्प रिपोर्टिंग साठी गटप्रवर्तकना १५०० रू सहामाही भत्ता व स्टेशनरी साठी ३००० रू. वार्षिक रक्कम द्यावी.
◆ आरोग्यसेविका भरतीमध्ये आशा व गटप्रवर्तक ना 50 टक्के आरक्षण मिळावे.
● आशांना योजनाबाह्य व मोबदला नसलेले काम देऊ नये.
● दरमहा मोबदल्याची हिशोब पावती आशा व गटप्रवर्तकांना द्यावी.